जळगाव-लाईव्ह ट्रेंड्स न्यूज प्रतिनिधी । जळगाव शहराचे नवे उपमहापौर मनोज चौधरी यांनी पदभार स्वीकारल्यानंतर शहराच्या विकासासाठी आपली स्पष्ट दिशा जाहीर केली आहे. त्यांनी सांगितले की, शहराचा सर्वांगीण विकास करण्यासाठी विविध योजना राबविण्यासोबत जिल्ह्याचे पालकमंत्री यांच्या माध्यमातून अतिरिक्त निधी मिळविण्यावर प्रयत्न केले जातील. त्यांच्या म्हणण्यानुसार, पालकमंत्री गुलाबराव पाटील यांनी यापूर्वी शहरासाठी १३५ कोटी रुपयांचा निधी मंजूर केला होता. त्याबद्दल त्यांचे आभार मानले.
उपमहापौर चौधरी यांनी सांगितले की, शहरातील कचरा व्यवस्थापन हा मुख्य प्रश्न असून, कचरा फॅक्टरीच्या माध्यमातून हा प्रश्न सोडवण्याचा प्रयत्न केला जाईल. शहरातील स्वच्छतेसाठी आधुनिक उपाययोजना राबविण्यासोबत नागरिकांसाठी आरोग्यपूर्ण आणि स्वच्छ वातावरण निर्माण करण्यावर भर दिला जाणार आहे. त्यांनी नगरसेवक व इतर पदाधिकाऱ्यांचा पाठिंबा मिळाल्याबद्दल आभारही मानले.
मनोज चौधरी यांनी शहराच्या विविध प्रभागांमध्ये रस्ते, पाणीपुरवठा, उद्याने आणि सार्वजनिक सुविधा यांसह सर्वत्र तंत्रज्ञानाचा वापर करून शहराचे स्मार्ट शहर रूपात रुपांतर करण्याचा संकल्प व्यक्त केला. त्यांनी नागरिकांना सहभाग आणि संवादातून विकासकामांना गती मिळविण्याचे आवाहन केले.
