मुंबई-लाईव्ह ट्रेंड्स न्यूज वृत्तसेवा। महाराष्ट्रातील २९ महानगरपालिकांच्या निवडणुकांचे निकाल जाहीर झाल्यानंतर आता राजकीय वर्तुळाचे लक्ष महापौरपदाच्या आरक्षणाकडे लागले आहे. शहराचा प्रथम नागरिक कोण होणार, याची दिशा ठरवणारी ही महत्त्वाची प्रक्रिया येत्या २२ जानेवारी २०२६ रोजी मंत्रालयात पार पडणार असून, या सोडतीमुळे राज्यातील राजकारणात मोठी हालचाल निर्माण झाली आहे.
राज्य शासनाच्या नगर विकास विभागाने दिलेल्या माहितीनुसार, २९ महानगरपालिकांच्या महापौरपदाच्या आरक्षणाची अधिकृत सोडत गुरुवार, २२ जानेवारी २०२६ रोजी काढण्यात येणार आहे. ही प्रक्रिया नगर विकास राज्यमंत्र्यांच्या अध्यक्षतेखाली पार पडेल. मंत्रालयाच्या सहाव्या मजल्यावरील परिषद सभागृहात सकाळी ११ वाजल्यापासून या सोडतीस सुरुवात होणार आहे. या सोडतीत अनुसूचित जाती (SC), अनुसूचित जमाती (ST), इतर मागास प्रवर्ग (OBC) तसेच महिलांसाठी राखीव असलेली महापौरपदे निश्चित केली जाणार आहेत.
मुंबई, पुणे, ठाणे, नाशिक, छत्रपती संभाजीनगर यांसारख्या मोठ्या शहरांसह राज्यातील सर्व २९ महानगरपालिकांसाठी ही सोडत अत्यंत निर्णायक मानली जात आहे. कोणत्या शहरात कोणत्या प्रवर्गासाठी आरक्षण निघते, यावरच अनेक राजकीय दिग्गजांचे महापौरपदाचे स्वप्न अवलंबून आहे. विशेषतः ज्या महानगरपालिकांमध्ये खुल्या प्रवर्गाचे आरक्षण जाहीर होण्याची शक्यता आहे, तेथे सत्ताधारी आणि विरोधकांमध्ये चुरस अधिक तीव्र होण्याची शक्यता वर्तवली जात आहे.
या सोडतीसाठी नगर विकास विभागाच्या वरिष्ठ अधिकाऱ्यांना उपस्थित राहण्याचे स्पष्ट आदेश देण्यात आले असून, संपूर्ण प्रक्रियेची माहिती राज्यमंत्र्यांच्या खाजगी सचिवांनाही देण्यात आली आहे. पारदर्शक आणि नियमानुसार आरक्षण प्रक्रिया राबवण्यासाठी आवश्यक ती सर्व तयारी पूर्ण करण्यात आली असल्याचे सूत्रांकडून सांगण्यात येत आहे. २२ जानेवारी रोजी दुपारपर्यंत राज्यातील २९ शहरांमधील महापौरपदाचे आरक्षण स्पष्ट होणार असल्याने, त्या अनुषंगाने राजकीय पक्षांची पुढील रणनीती ठरणार आहे.
