फैजपूर-लाईव्ह ट्रेंड्स न्यूज प्रतिनिधी । समाजातील विविध घटकांना एकत्र आणत सामाजिक बांधिलकीचा संदेश देणारा उपक्रम पिंपरूड येथे यशस्वीपणे पार पडला. राहुल कोल्हे सामाजिक मित्र परिवार व दिव्यांग व सामाजिक बहुउद्देशीय संस्थेच्या वतीने आयोजित राष्ट्रीय युवा दिन कार्यक्रमात पत्रकार सन्मान, दिव्यांगांना उपयुक्त साहित्य वितरण आणि रक्ततपासणी शिबीर अशा बहुआयामी उपक्रमांचे आयोजन करण्यात आले.
दरवर्षीप्रमाणे यंदाही राष्ट्रीय युवा दिनाचे औचित्य साधत बाळशास्त्री जांभेकर, स्वामी विवेकानंद आणि राजमाता जिजाऊ यांच्या जयंती साजऱ्या करण्यात आल्या. या कार्यक्रमाचे अध्यक्षस्थान प्रांताधिकारी बबनराव काकडे यांनी भूषवले, तर दिव्यांग मंडळाचे अध्यक्ष डॉ. मारोती पोटे, डाएटचे अधिव्याख्याता प्रा. शैलेश पाटील आणि राज्य कर सहाय्यक आयुक्त डाळिंबी ताई सरोदे हे प्रमुख अतिथी म्हणून उपस्थित होते. मान्यवरांच्या हस्ते दीपप्रज्वलन व प्रतिमापूजन करून कार्यक्रमाची सुरुवात झाली.
कार्यक्रमात पत्रकार बांधवांचा सन्मान करण्यात आला तसेच प्रशासनातील अधिकारी व कर्मचाऱ्यांना ‘दिव्यांग मित्र’ म्हणून गौरविण्यात आले. यावेळी तलाठी श्वेता ससाने, ग्रामसेवक बाळू वायकोळे, सहाय्यक महसूल अधिकारी सेखावत तडवी, सहाय्यक प्रकल्प अधिकारी प्रवीण सपकाळे, वकील राकेश पाटील, सेवानिवृत्त पोलीस उपआयुक्त दिलीप सूर्यवंशी यांनी कार्यक्रमाला भेट देत उपस्थिती लावली.
दिव्यांग बांधवांसाठी विशेष स्वरूपाचे साहित्य वितरण करण्यात आले. अशोक कोळी, विनोद बिऱ्हाडे आणि कमल बेलसरे यांना ब्लँकेट, तर विष्णू साळवे यांना ड्रेस व ब्लँकेट देण्यात आले. त्यांच्या मुलांना केयूर महाजन, मेहुल पाटील आणि ज्ञानेश्वर कोळी यांना शालेय बॅग तसेच ऑनलाईन रेशन कार्ड व संजय योजना मंजुरीची पत्रे देण्यात आली. याशिवाय ९५ टक्के दृष्टिहीन असलेल्या सुवासिनी चौधरी यांनी भागवत कथेतील १८ अध्यायांचे तोंडी वाचन केल्याबद्दल त्यांचा विशेष सन्मान करण्यात आला.
पत्रकार सन्मान सोहळ्यात लोकमत, सकाळ, खान्देश लाईव्ह न्यूज, नवराष्ट्र, पुण्य नगरी, लोकशाही, स्वतंत्र लोकशाही, देशोन्नती, जनता की बात, यावल न्यूज, तरुण भारत, लोकमत समाचार, पुण्य प्रताप, नेशन महाराष्ट्र, देशदूत आदी विविध माध्यमांतील पत्रकारांना सन्मानचिन्ह, मेडल, पेन व शाल देऊन गौरविण्यात आले. या सन्मानामुळे पत्रकारांमध्ये समाधान व उत्साहाचे वातावरण दिसून आले.
याच कार्यक्रमात यावल ग्रामीण रुग्णालयाच्या आयसीटीसी विभागाच्या वतीने रक्ततपासणी शिबीर घेण्यात आले. विभागप्रमुख वसंतकुमार सदानशिव, रवींद्र माळी आणि मिलिंद राणे यांनी तपासणी केली. पोलीस पाटील हरीश चौधरी, नितीन जंगले यांचीही उपस्थिती होती.
यावेळी जळगाव येथे २०२६ मध्ये आयोजित करण्यात येणाऱ्या राज्यस्तरीय दिव्यांग वधू-वर परिचय मेळाव्याबाबत माहिती देत इच्छुकांनी राहुल कोल्हे (९४०५९१८५०३) व योगेश चौधरी (९३७३०८४००५) यांच्याकडे फॉर्म भरून लवकरात लवकर जमा करण्याचे आवाहन करण्यात आले. कार्यक्रमाचे सूत्रसंचालन संजय सराफ यांनी केले तर आभार संस्थाध्यक्ष मुन्ना चौधरी यांनी मानले.
मार्गदर्शक राहुल कोल्हे, उपाध्यक्ष चेतन तळेले, सचिव विशाल दांडगे, चिराग पाटील, पराग वारके, भगवान कोळी, सोनू कोळी यांच्यासह कार्यकर्त्यांनी कार्यक्रमाच्या यशस्वीतेसाठी विशेष परिश्रम घेतले. मोठ्या संख्येने दिव्यांग बांधव उपस्थित होते आणि कार्यक्रमानंतर सर्वांनी सामूहिक भोजनाचा आस्वाद घेतला.
