जळगाव-लाईव्ह ट्रेंड्स न्यूज प्रतिनिधी । जळगाव शहर महानगरपालिकेच्या सार्वत्रिक निवडणुकीच्या पार्श्वभूमीवर निवडणूक प्रक्रिया निर्भय, मुक्त व पारदर्शकपणे पार पडावी यासाठी प्रशासनाने महत्त्वाचे निर्देश जारी केले आहेत. राज्य निवडणूक आयोगाने जाहीर केलेल्या निवडणूक कार्यक्रमानुसार १५ जानेवारी २०२६ रोजी मतदान होणार असून त्याआधी प्रचारबंदीच्या नियमांची काटेकोर अंमलबजावणी केली जाणार आहे.
राज्य निवडणूक आयोगाने १५ डिसेंबर २०२५ रोजी महानगरपालिकेच्या सार्वत्रिक निवडणुकीचा कार्यक्रम जाहीर केला होता. त्यानुसार मतदानाची तारीख १५ जानेवारी २०२६ निश्चित करण्यात आली आहे. या निवडणुकीदरम्यान कोणताही दबाव, गैरप्रकार किंवा अपप्रचार होऊ नये, यासाठी प्रचारबंदीचा कालावधी मतदानाच्या ४८ तास आधी लागू करण्यात येणार आहे.
महानगरपालिका प्रशासनाने दिलेल्या माहितीनुसार, जाहीर प्रचारबंदीचा कालावधी १३ जानेवारी २०२६ रोजी सायंकाळी ५.३० वाजल्यापासून सुरू होणार आहे. या वेळेनंतर सर्व प्रकारचा निवडणूक प्रचार थांबवणे बंधनकारक राहील. तसेच निवडणूक प्रचाराशी संबंधित कोणतीही जाहिरात, प्रसिद्धी किंवा प्रसारण इलेक्ट्रॉनिक तसेच प्रिंट मीडियामधून करता येणार नाही, असे स्पष्ट निर्देश देण्यात आले आहेत.
प्रचारबंदीच्या कालावधीत, म्हणजेच मतदानाच्या आदल्या दिवशी आणि मतदानाच्या दिवशी वृत्तपत्रे, दूरदर्शन, सोशल मीडिया तसेच इतर कोणत्याही माध्यमातून प्रचारात्मक मजकूर प्रसिद्ध करण्यास सक्त मनाई करण्यात आली आहे. याबाबत सर्व उमेदवार, राजकीय पक्ष आणि त्यांच्या समर्थकांनी विशेष खबरदारी घ्यावी, अन्यथा कायदेशीर कारवाईला सामोरे जावे लागेल, असा इशाराही प्रशासनाने दिला आहे.
जळगाव शहर महानगरपालिकेचे निवडणूक अधिकारी तथा आयुक्त ज्ञानेश्वर ढेरे यांनी या संदर्भात माहिती देताना सांगितले की, लोकशाही प्रक्रियेतील विश्वास टिकवण्यासाठी नियमांचे पालन अत्यंत आवश्यक आहे. सर्व संबंधितांनी सहकार्य केल्यास निवडणूक प्रक्रिया शांततेत आणि पारदर्शकपणे पार पडेल, असा विश्वास त्यांनी व्यक्त केला.
