जळगाव – लाईव्ह ट्रेंड्स न्यूज प्रतिनिधी । शहरात गेल्या महिनाभरात वाढलेल्या घरफोडीच्या घटनांमुळे नागरिकांमध्ये भीतीचे वातावरण निर्माण झाले होते. या पार्श्वभूमीवर स्थानिक गुन्हे शाखेने मोठी कारवाई करत आंतरराज्यीय अट्टल गुन्हेगार चंदन राजू जुनी याला अटक करून दोन मोठ्या घरफोडीचे गुन्हे उघडकीस आणले आहेत.
पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांच्या आदेशानुसार स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांनी दोन स्वतंत्र पथकांची स्थापना करून तपास सुरू केला होता. शहरातील विविध भागांतील सीसीटीव्ही फुटेजचे बारकाईने तांत्रिक विश्लेषण करत संशयित आरोपीची ओळख पटविण्यात पोलिसांना यश आले.
त्यानुसार चंदन राजू जुनी (वय ४५, रा. सरदारपाडा वस्ती, उल्हासनगर-१, ता. कल्याण, जि. ठाणे) याला पुण्यातील हडपसर परिसरातून ताब्यात घेण्यात आले. चौकशीत त्याने शनीपेठ पोलीस ठाण्यात दाखल असलेल्या सीसीटीएनएस क्रमांक २५१/२०२५ व २५२/२०२५ अन्वये घरफोडीचे दोन गुन्हे केल्याची कबुली दिली. हे गुन्हे त्याने त्याचा भाऊ कुलदीप राजू जुनी आणि आणखी दोन साथीदारांच्या मदतीने केल्याचेही स्पष्ट झाले.
चोरी केलेल्या मुद्देमालाची विल्हेवाट कुलदीप जुनी याने लावून त्यातील ३८ हजार रुपये ऑनलाईन पद्धतीने चंदनच्या बँक खात्यावर पाठविल्याची माहितीही चौकशीत उघड झाली आहे. अटक करण्यात आलेल्या चंदन जुनीला पुढील कारवाईसाठी शनीपेठ पोलीस ठाण्याच्या ताब्यात देण्यात आले असून उर्वरित आरोपींचा शोध सुरू आहे. पुढील तपास पोलीस उपनिरीक्षक योगेश ढिकले करीत आहेत.
ही संपूर्ण कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि वरिष्ठ पोलीस निरीक्षक राहुल गायकवाड यांच्या मार्गदर्शनाखाली स्थानिक गुन्हे शाखेच्या पथकाने यशस्वीरीत्या पार पाडली. तांत्रिक व नेत्रम विभागाच्या सहकार्याने गुन्हे उघडकीस येण्यास मोठी मदत झाली आहे
