जळगाव-लाईव्ह ट्रेंड्स न्यूज प्रतिनिधी । शासकीय अभियांत्रिकी महाविद्यालय, जळगाव (GCOE) येथे येत्या ३ व ४ जानेवारी २०२६ रोजी भव्य माजी विद्यार्थी मेळावा २०२६ आयोजित करण्यात आला असून, यंदाचा मेळावा ऐतिहासिक ठरणार आहे. याचे प्रमुख आकर्षण म्हणजे सन २००१ बॅचने शिक्षण पूर्ण केल्यानंतर २५ वर्षे पूर्ण केल्याच्या निमित्ताने त्यांचा रौप्य महोत्सव मोठ्या उत्साहात साजरा करण्यात येणार आहे.
महाविद्यालयाच्या शैक्षणिक, सामाजिक व सांस्कृतिक वाटचालीत २००१ बॅचचे योगदान अत्यंत महत्त्वपूर्ण राहिले आहे. या बॅचमधील माजी विद्यार्थी आज उद्योग, संशोधन, प्रशासन, शिक्षण, माहिती तंत्रज्ञान तसेच उद्योजकता अशा विविध क्षेत्रांत देश-विदेशात यशस्वीपणे कार्यरत आहेत. त्यांच्या या प्रेरणादायी प्रवासाचा गौरव करण्यासाठी विशेष रौप्य महोत्सव समारंभ आणि सत्कार कार्यक्रमाचे आयोजन करण्यात आले आहे.
महाविद्यालयाचे प्राचार्य डॉ. सुहास गाजरे तसेच अधिष्ठाता (इनोव्हेशन, इनक्युबेशन आणि लिंकेजेस) डॉ. गजानन माळवटकर यांनी संस्थेच्या वतीने सर्व माजी विद्यार्थ्यांना, विशेषतः २००१ बॅचच्या सर्व सहाध्यायांना या मेळाव्यास उपस्थित राहण्याचे आवाहन केले आहे. माजी विद्यार्थी व संस्था यांच्यातील नाते अधिक दृढ करणे, अनुभवांचे आदान–प्रदान घडवून आणणे आणि उद्योग–संस्था सहकार्य वाढविणे हा या मेळाव्याचा मुख्य उद्देश असल्याचे त्यांनी स्पष्ट केले.
मेळाव्याच्या पहिल्या दिवशी, शनिवार ३ जानेवारी २०२६ रोजी सकाळी ९.३० वाजता माजी विद्यार्थ्यांची नोंदणी होणार असून, सकाळी १०.३० वाजता उद्घाटन समारंभ पार पडणार आहे. त्यानंतर प्राचार्य डॉ. सुहास गाजरे यांचे मार्गदर्शन, माजी विद्यार्थी–संस्था संवाद सत्र, विभाग भेट व कॅम्पस भ्रमण, विद्यार्थ्यांचा सांस्कृतिक कार्यक्रम तसेच स्नेहभोजन व अनौपचारिक संवादाचे आयोजन करण्यात आले आहे.
रविवार, ४ जानेवारी २०२६ रोजी सकाळी १० वाजता २००१ बॅचचा रौप्य महोत्सव विशेष समारंभ होणार असून, यामध्ये २००१ बॅच व मान्यवर माजी विद्यार्थ्यांचा सत्कार करण्यात येईल. त्यानंतर उद्योग–संस्था संवाद सत्र, अनुभव कथन, जुन्या आठवणींना उजाळा देणारी मुक्त चर्चा आणि सायंकाळी समारोप समारंभाने या दोन दिवसांच्या मेळाव्याची सांगता होणार आहे.
या माजी विद्यार्थी मेळाव्याचे आयोजन शासकीय अभियांत्रिकी महाविद्यालय, जळगाव माजी विद्यार्थी संघटना व महाविद्यालय प्रशासन यांच्या संयुक्त विद्यमाने करण्यात येत असून, विविध समित्यांच्या माध्यमातून कार्यक्रमाचे नियोजन अंतिम टप्प्यात आहे. आयोजन समितीने सर्व माजी विद्यार्थ्यांनी, विशेषतः २००१ बॅचच्या सर्व माजी विद्यार्थ्यांनी मोठ्या संख्येने उपस्थित राहून या रौप्य महोत्सवी मेळाव्याला यशस्वी करण्याचे आवाहन केले आहे.
एकूणच, आठवणींना उजाळा देणारा, अनुभवांची देवाणघेवाण घडवून आणणारा आणि संस्थेशी नाते अधिक दृढ करणारा हा माजी विद्यार्थी मेळावा GCOE जळगावच्या इतिहासात एक संस्मरणीय पर्व ठरणार आहे.
