यावल-लाईव्ह ट्रेंड्स न्यूज प्रतिनिधी । यावल तालुक्यातील सातपुडा पर्वताच्या पायथ्याशी वसलेल्या चुंचाळे गावाच्या शिवारात बिबट्याचा वावर पुन्हा एकदा दिसून आल्याने परिसरात भीतीचे वातावरण निर्माण झाले आहे. शेतकरी व शेतमजुरांमध्ये दहशत पसरली असून, वनविभागाने या गंभीर विषयाकडे तातडीने लक्ष द्यावे, अशी जोरदार मागणी ग्रामस्थांकडून होत आहे.
गेल्या काही दिवसांपासून चुंचाळे परिसरात बिबट्याची हालचाल असल्याची चर्चा शेतकरी व मजुरांमध्ये सुरू होती. दोन दिवसांपूर्वी गुलशेर रमजान तडवी यांच्या शेतात गावातील बंडू कुंभार, जे वायरमन म्हणून ओळखले जातात, यांना प्रत्यक्ष बिबट्या वावरताना दिसून आला. या घटनेनंतर परिसरातील नागरिकांमध्ये भीतीचे वातावरण अधिकच गडद झाले आहे.
विशेष म्हणजे काही महिन्यांपूर्वीही याच बिबट्याचे दर्शन परिसरातील अनेक शेतकरी, शेतमजूर व ग्रामस्थांना झाले होते. त्यावेळी वनविभागाकडून ठोस उपाययोजना करण्यात न आल्याचा आरोप ग्रामस्थांकडून केला जात आहे. परिणामी बिबट्याचा वावर पुन्हा सुरू राहिल्याने शेतीकामासाठी शिवारात जाणेही धोक्याचे ठरत आहे.
चुंचाळे गाव यावल तालुक्यातील वनविभागाच्या पश्चिम क्षेत्रात येत असून सातपुडा पर्वताच्या जंगलालगत असल्याने वन्यप्राण्यांचा वावर नेहमीच असतो. मात्र बिबट्यासारख्या हिंसक वन्यप्राण्याच्या सततच्या हालचालीमुळे एखादी अप्रिय घटना घडण्याची भीती नागरिक व्यक्त करीत आहेत. त्यामुळे यावल पश्चिम क्षेत्राच्या वनविभागाने तात्काळ दक्षता घेऊन पिंजरे लावणे, गस्त वाढवणे तसेच नागरिकांना योग्य सूचना देणे आवश्यक असल्याचे मत ग्रामस्थांनी व्यक्त केले आहे.
संक्षेप: चुंचाळे शिवारात बिबट्याचे पुन्हा दर्शन झाल्याने सातपुडा पायथ्याशी असलेल्या गावांमध्ये भीतीचे वातावरण पसरले असून, संभाव्य दुर्घटना टाळण्यासाठी वनविभागाने तातडीने उपाययोजना कराव्यात, अशी मागणी नागरिकांकडून होत आहे.
