भुसावळ-लाईव्ह ट्रेंडस न्यूज प्रतिनिधी । भुसावळ तालुक्यातील वरणगाव परिसरातून एक अत्यंत हृदयद्रावक घटना समोर आली आहे. भुसावळ तालुक्यातील किन्ही वेल्हाळे शिवारात ट्रॅक्टर उलटून झालेल्या भीषण अपघातात पिता आणि त्यांच्या सात वर्षीय चिमुकल्याचा जागीच मृत्यू झाला आहे. ही घटना बुधवार, २४ डिसेंबर रोजी दुपारी १२ वाजेच्या सुमारास ही दुर्घटना घडली. या घटनेमुळे संपूर्ण सिद्धेश्वर नगर परिसरात हळहळ व्यक्त केली जात आहे.
मिळालेल्या माहितीनुसार, वरणगाव येथील सिद्धेश्वर नगरमधील रहिवासी आणि ट्रॅक्टर चालक संजय श्रावण साबळे (वय ४०) हे त्यांच्या ट्रॅक्टरने किन्ही शिवारातील गिट्टी मशीनवर ‘कच’ आणण्यासाठी जात होते. त्यांच्यासोबत त्यांचा ७ वर्षांचा मुलगा भूषण संजय साबळे आणि अक्षय संतोष मोरे (वय २४) हा मजूर देखील होता. प्रवास सुरू असताना अचानक ट्रॅक्टरमध्ये तांत्रिक बिघाड झाला आणि चालकाचे नियंत्रण सुटल्याने ट्रॅक्टर रस्त्यावरच उलटला.
कुटुंबाचा आधार हरपला हा अपघात इतका भीषण होता की, ट्रॅक्टरखाली दाबले गेल्याने चालक संजय साबळे आणि त्यांचा मुलगा भूषण या दोघांचाही जागीच मृत्यू झाला. डोळ्यांदेखत बाप-लेकाचा असा अंत झाल्याने प्रत्यक्षदर्शींनाही धक्का बसला. या अपघातात ट्रॅक्टरवरील मजूर अक्षय मोरे हा गंभीर जखमी झाला असून, त्याला तातडीने पुढील उपचारासाठी रुग्णालयात हलवण्यात आले आहे.
घटनेची माहिती मिळताच परिसरातील नागरिकांनी मदतीसाठी धाव घेतली. कामासाठी घराबाहेर पडलेल्या पित्यासोबत मुलाचाही मृत्यू झाल्याने साबळे कुटुंबावर दुःखाचा डोंगर कोसळला आहे. यावळी वरणगाव ग्रामीण रूग्णालयात नातेवाईकांनी प्रचंड गर्दी केली आणि कुटुंबांनी आक्रोश केल्याचे पहायला मिळाले.
