धरणगाव-लाईव्ह ट्रेंडस न्यूज प्रतिनिधी । धरणगाव शहरात श्री गुरूदेव दत्त महाराजांचा जन्मोत्सव सोहळा गुरुवारी, ४ डिसेंबर रोजी मोठ्या उत्साहात साजरा झाला. या पवित्र सोहळ्यानिमित्त येथील श्री दत्त महाराज मंदिराच्या टेकडी परिसरात गायरान बचाव मंच आणि श्री दत्त जयंती उत्सव समिती यांच्या संयुक्त विद्यमाने भव्य महाप्रसाद भंडाराचे आयोजन करण्यात आले होते.
दत्त जयंतीच्या या कार्यक्रमासाठी भाविकांनी उत्स्फूर्त प्रतिसाद दिला. सकाळी ११ वाजता या महाप्रसाद भंडाऱ्याचे वितरण सुरू झाले. विशेष म्हणजे, या महाभंडाऱ्यासाठी आवश्यक असलेला सर्वात मोठा घटक असलेल्या १० हजार पोळ्यांचे संकलन करण्याची मोहीम यशस्वीपणे राबवण्यात आली. या पोळ्या डॉ. हेडगेवार ग्रामपंचायतीच्या माध्यमातून परिसरातील भाविकांकडून जमा करण्यात आल्या. लोकांच्या या लोकसहभागामुळे धार्मिक उत्सवाला सामाजिक एकजुटीची जोड मिळाली.
गायरान बचाव मंचचे अध्यक्ष अमोल महाजन आणि सदस्य चंदु भावसार यांनी या महाप्रसाद भंडाऱ्याच्या यशस्वी आयोजनासाठी पुढाकार घेतला. त्यांच्या नेतृत्वाखालील समितीने हा अन्नदानाचा महायज्ञ पूर्णत्वास नेला. शहरातील हजारो भाविकांनी या महाप्रसादाचा लाभ घेतला. धरणगावातील या सोहळ्यामुळे नागरिकांमध्ये धार्मिक एकोपा आणि उत्साहाचे वातावरण दिसून आले.
