वरणगाव-लाईव्ह ट्रेंड्स न्यूज प्रतिनिधी । वरणगावातील (ता. भुसावळ) स्थानिक पत्रकारितेत आपल्या निर्भीड आणि प्रामाणिक शैलीसाठी ओळख निर्माण करणारे अनुभवी पत्रकार सुनील पाचपोळ यांच्या आकस्मिक निधनाने संपूर्ण परिसरात शोककळा पसरली आहे. समाजातील विविध प्रश्नांना उजेडात आणत सामान्य जनतेच्या समस्या दखलपात्र करण्यासाठी त्यांनी आयुष्यभर समान लढा दिला.
अनेक वर्षे त्यांनी स्थानिक पातळीवर पत्रकारितेची निष्ठापूर्वक वाटचाल केली. सामाजिक न्यायासाठी केलेल्या त्यांच्या परखड लेखनामुळे स्थानिक प्रशासनास अनेक मुद्द्यांकडे गांभीर्याने लक्ष देण्यास भाग पाडले. त्यांच्या बातम्यांनी तळागाळातील नागरिकांना आवाज मिळवून देत न्यायप्रक्रियेपर्यंत पोहोचण्याचा मार्ग खुला केला. त्यामुळेच त्यांना वरणगाव परिसरात एक सजग, प्रामाणिक आणि निष्ठावंत पत्रकार म्हणून मान्यता प्राप्त झाली होती.
त्यांच्या निधनाने कुटुंबीयांवर दुःखाचा डोंगर कोसळला असून त्यांच्या पश्चात पत्नी आणि दोन मुली असा परिवार आहे. अचानक घडलेल्या या घटनेने मित्रपरिवार, सहकारी पत्रकार आणि स्थानिक नागरिकांमध्ये मोठी हळहळ व्यक्त केली जात आहे.
