जळगाव लाईव्ह ट्रेंडस न्यूज प्रतिनिधी । जळगाव शहरातील हरिविठ्ठल नगर परिसरात एक धक्कादायक घटना घडली आहे. बहिणीने घटस्फोटासाठी दाखल केलेला खटला मागे घ्यावा, यासाठी दमदाटी करणाऱ्या एका संशयिताने नकार मिळाल्यानंतर चक्क तरुणीच्या मालकीची दुचाकी पेट्रोल टाकून पेटवून दिली. ही घटना सोमवारी सायंकाळी घडली असून, याप्रकरणी रामानंद नगर पोलीस ठाण्यात गुन्हा दाखल करण्यात आला आहे.
पुजा विजय पाटील (वय २९, रा. हरिविठ्ठल नगर) यांनी दिलेल्या फिर्यादीनुसार, त्यांच्या बहिणीने, कोमल विजय पाटील, यांनी घटस्फोटासाठी न्यायालयात खटला दाखल केला आहे. याच परिसरात राहणारा संशयित पंकज साहेबराव मराठे (सूर्यवंशी) याने ही केस मागे घेण्यासाठी कोमल पाटील यांच्यावर दबाव टाकण्यास सुरुवात केली होती.
घटनेच्या दिवशी, म्हणजेच २७ तारखेच्या पहाटे ३ वाजेच्या सुमारास, संशयित पंकज मराठे हा पुजा पाटील यांच्या घरी गेला. त्याने कोमल पाटील यांना घटस्फोटाची केस मागे घेण्यासंदर्भात पुन्हा एकदा दमदाटी केली, तसेच शिवीगाळही केली.
कोमल पाटील यांनी केस मागे घेण्यास नकार दिल्याने संतप्त झालेल्या पंकज मराठे याने कंपाऊंडमध्ये लावलेली पुजा पाटील यांच्या मालकीची एमएच १९, डीएफ ४०४९ क्रमांकाची दुचाकी बाहेर काढली. त्याने दुचाकीवर पेट्रोल टाकून ती जाळली आणि त्यानंतर तो तेथून पसार झाला. या आगीत दुचाकीचे मोठे नुकसान झाले आहे.
या गंभीर प्रकाराबाबत पुजा पाटील यांनी तात्काळ रामानंद नगर पोलीस ठाण्यात धाव घेत संशयित पंकज साहेबराव मराठे (सूर्यवंशी) विरुद्ध फिर्याद दाखल केली. पोलिसांनी भादंविच्या संबंधित कलमांखाली गुन्हा दाखल केला असून, या प्रकरणाचा पुढील तपास पोलीस हेड कॉन्स्टेबल भीका खाटीक हे करीत आहेत.
