बुलढाणा-लाईव्ह ट्रेंडस न्यूज प्रतिनिधी । महावितरणने वीजबिल वसुलीसाठी कठोर धोरण स्वीकारले असून, बुलढाणा जिल्ह्यात याची सुरुवात झाली आहे. जिल्ह्यातील अधीक्षक अभियंता सुरेंद्र कटके यांनी आजपासूनच स्वतः मैदानात उतरून ‘नो बिल पेंडिंग’ ही मोहीम कडकपणे राबवण्यास सुरुवात केली आहे. सकाळीच त्यांनी संपूर्ण यंत्रणेला सज्ज राहण्याच्या सूचना दिल्या असून, थकीत वीजबिल असलेल्या ग्राहकांना बिल भरण्यास बाध्य केले जाणार आहे.
थकबाकीदारांशी थेट संपर्क साधण्यावर भर
या मोहिमेअंतर्गत सुरेंद्र कटके हे स्वतः जिल्ह्याचा दौरा करत आहेत. ते थकबाकीदारांशी प्रत्यक्ष संपर्क साधून त्यांना वीजबिल भरण्याचे आवाहन करत आहेत. याशिवाय, स्थानिक पातळीवरील अभियंते आणि कर्मचाऱ्यांनाही ही मोहीम गतिमान करण्यासाठी योग्य त्या सूचना देण्यात आल्या आहेत. महावितरणच्या या नव्या भूमिकेमुळे जिल्ह्यातील वीजबिल वसुली वाढण्यास मदत होईल, अशी अपेक्षा व्यक्त केली जात आहे. तसेच, ग्राहकांमध्ये वेळेवर बिल भरण्याबद्दल जागरूकता निर्माण करणे हा देखील या मोहिमेचा एक महत्त्वाचा उद्देश आहे.
बिल न भरल्यास वीजपुरवठा खंडित करण्याची शक्यता
या मोहिमेच्या माध्यमातून महावितरणने ग्राहकांना एक स्पष्ट संदेश दिला आहे: “वेळेवर वीजबिल भरा, अन्यथा तुमचा वीजपुरवठा खंडित केला जाऊ शकतो.” सुरेंद्र कटके यांनी ट्रेड न्यूजशी बोलताना सांगितले की, प्रशासनाने आता या मोहिमेला गती देण्याचा निर्णय घेतला आहे. यामुळे ज्या ग्राहकांनी अद्याप वीजबिल भरलेले नाही, त्यांनी तात्काळ ते भरावे, असे आवाहन करण्यात आले आहे. वीजपुरवठा खंडित होण्याची वेळ येऊ नये यासाठी नागरिकांनी सहकार्य करण्याचे आवाहन महावितरणने केले आहे.
