धरणगाव-लाईव्ह ट्रेंडस न्यूज प्रतिनिधी ।प्रवाशांची अनेक वर्षांपासूनची मागणी पूर्ण झाली असून, तिरुपती-हिस्सार एक्सप्रेस या गाडीला धरणगाव रेल्वे स्टेशनवर थांबा मिळाला आहे. खासदार श्रीमती स्मिताताई वाघ यांच्या अथक प्रयत्नांमुळे आणि धरणगाव तालुका प्रवासी मंडळाच्या सातत्यपूर्ण पाठपुराव्यामुळे हे शक्य झाले. यामुळे परिसरातील हजारो प्रवाशांना मोठा दिलासा मिळाला असून, नागरिकांनी आनंद व्यक्त केला आहे.
भाजपच्या ज्येष्ठ नेत्यांनी दिला हिरवा झेंडा
आज, मंगळवार २२ ऑगस्ट रोजी सकाळी भाजपचे ज्येष्ठ नेते शिरीषअप्पा बयस यांच्या हस्ते तिरुपती-हिस्सार एक्सप्रेसला हिरवा झेंडा दाखवून धरणगावहून मुंबईकडे मार्गस्थ करण्यात आले. हा क्षण धरणगावकरांसाठी ऐतिहासिक होता. या प्रसंगी भाजप जिल्हा उपाध्यक्ष संजय महाजन, गट नेते कैलास माळी, तसेच इतर अनेक पदाधिकारी व कार्यकर्ते मोठ्या संख्येने उपस्थित होते.
प्रवासी मंडळाच्या प्रयत्नांचे यश
या सोहळ्याला धरणगाव तालुका प्रवासी मंडळाचे सर्व पदाधिकारी आणि सदस्य मोठ्या संख्येने उपस्थित होते. मंडळाचे अध्यक्ष आणि डीआरयूसीसी मेंबर महेंद्र कोठारी, उपाध्यक्ष रवींद्र भागवत, सचिव एस.डब्ल्यू. पाटील, सहसचिव किरण वाणी आणि इतर सदस्यांनी या थांब्यासाठी अथक प्रयत्न केले होते. त्यांच्या या प्रयत्नांचे फळ आज सर्वांनी अनुभवले. याप्रसंगी डॉ. हेडगेवार नगर परिसरातील नागरिक, प्रा. अरुण शिंदे, प्रा. एस. झेड. पाटील, आणि प्रथम प्रवासी उदय भावे हेही उपस्थित होते.
स्थानिक नागरिक आणि विद्यार्थ्यांसाठी महत्त्वाचा थांबा
तिरुपती-हिस्सार एक्सप्रेसला मिळालेल्या थांब्यामुळे केवळ लांब पल्ल्याच्या प्रवाशांनाच नव्हे, तर शिक्षण आणि नोकरीसाठी बाहेरगावी जाणाऱ्या विद्यार्थ्यांना आणि तरुणांनाही मोठा फायदा होणार आहे. या थांब्यामुळे धरणगावाचा थेट संपर्क अनेक मोठ्या शहरांशी वाढला आहे. हा थांबा मिळवून देण्यासाठी ज्यांनी ज्यांनी प्रयत्न केले, त्यांचे नागरिकांनी आभार मानले आहेत.
