जळगाव-लाईव्ह ट्रेंडस न्यूज प्रतिनिधी । जळगाव शहरातील लक्ष्मी नगरात जुन्या भांडणाच्या कारणावरून तिघा तरुणांना शिवीगाळ करत मारहाण केल्याची आणि जीवे ठार मारण्याची धमकी दिल्याची घटना मंगळवारी, १२ ऑगस्ट रोजी रात्री ९.३० वाजता घडली आहे. या प्रकरणी रात्री ११ वाजता जळगाव शहर पोलीस ठाण्यात संबंधित आरोपींविरोधात अदखलपात्र गुन्हा दाखल करण्यात आला आहे.
पोलिसांकडून मिळालेल्या माहितीनुसार, अजय कैलास जाधव (वय २२, रा. लक्ष्मी नगर, जळगाव) हा तरुण मंगळवारी रात्री ९.३० वाजता त्याचे मित्र आकाश प्रकाश बाविस्कर आणि हर्षल रविंद्र जैस्वाल यांच्यासोबत लक्ष्मी नगरात गप्पा मारत होता. त्याचवेळी, जुन्या भांडणाच्या कारणावरून तनवीर उर्फ तान्या शेख आणि त्याच्यासोबतचे तीन अनोळखी इसम तिथे आले.
त्यांनी कोणताही विचार न करता अजय जाधव आणि त्याचे मित्र आकाश बाविस्कर व हर्षल जैस्वाल यांना शिवीगाळ करण्यास सुरुवात केली. त्यानंतर त्यांना बेदम मारहाण केली आणि जीवे ठार मारण्याची धमकीही दिली. या घटनेमुळे लक्ष्मी नगरात काही काळ तणावाचे वातावरण निर्माण झाले होते.
या मारहाणीनंतर अजय जाधव याने तात्काळ जळगाव शहर पोलीस ठाण्यात धाव घेऊन तक्रार दाखल केली. त्यांच्या तक्रारीवरून, तनवीर उर्फ तान्या शेख आणि त्याच्यासोबतच्या तीन अनोळखी व्यक्तींविरोधात शहर पोलीस ठाण्यात अदखलपात्र गुन्हा नोंदवण्यात आला आहे. या प्रकरणाचा पुढील तपास पोलीस हेडकॉन्स्टेबल प्रफुल्ल धांडे करत आहेत.
