पुरी – लाईव्ह ट्रेंड्स न्यूज वृत्तसेवा । ओडिशातील प्रसिद्ध जगन्नाथ मंदिर उडवण्याची दहशतवादी धमकी मिळाल्यानंतर पुरी शहरात खळबळ उडाली आहे. जगभरातील कोट्यवधी श्रद्धाळूंच्या आस्थेचे केंद्र असलेल्या या ऐतिहासिक मंदिराच्या सुरक्षिततेबाबत गंभीर प्रश्न उपस्थित झाले आहेत. या घटनेमुळे मंदिर परिसरात भीतीचे वातावरण पसरले असून, पोलीस आणि सुरक्षा यंत्रणांनी चौकट कडक केली आहे.
धमकीचा संदेश जगन्नाथ मंदिराच्या परिक्रमा मार्गावरील एका इतर मंदिराच्या भिंतीवर लिहिण्यात आला आहे. हा मजकूर ओडिया आणि इंग्रजी या दोन्ही भाषांमध्ये असून, त्यात स्पष्टपणे लिहिले आहे की, “जगन्नाथ मंदिरावर दहशतवादी हल्ला केला जाईल आणि ते नष्ट केले जाईल. कॉल करा, अन्यथा सर्व काही उद्ध्वस्त होईल.” या संदेशासोबत काही फोन नंबर आणि “पंतप्रधान मोदी” अशा उल्लेखांचाही समावेश आहे, त्यामुळे प्रकरण अधिकच संवेदनशील बनले आहे.
पोलीस प्रशासनाने तातडीने मंदिर परिसरातील सीसीटीव्ही फुटेजची तपासणी सुरू केली आहे. विशेष म्हणजे, जेथे हा धमकीचा मजकूर लिहिण्यात आला आहे, तो भाग सतत पोलिसांच्या देखरेखीखाली असतो आणि विविध अँगलमधून सीसीटीव्हीच्या कव्हरेजमध्ये येतो. त्यामुळे असा संदेश कोण आणि कसा लिहू शकतो, हा मोठा प्रश्न उपस्थित झाला आहे.
घटनास्थळाजवळील हेरिटेज कॉरिडॉरमधील काही सजावटीचे दिवे अचानक बंद पडल्याचेही आढळले असून, हे दिवे बंद होण्याचे कारण शोधले जात आहे. या सर्व घटनेनंतर स्थानिक भाविकांमध्ये भीतीचे आणि अस्वस्थतेचे वातावरण निर्माण झाले आहे. एक भाविक म्हणाले, “सतत सुरक्षा असलेल्या ठिकाणी जर कोणी भिंतीवर असे धमकीचे संदेश लिहू शकत असेल, तर मग आम्ही कशावर विश्वास ठेवायचा?”
या घटनेमुळे मंदिर सुरक्षा व्यवस्थेची विश्वासार्हता तपासली जात असून, अनेक नागरिकांनी प्रशासनाच्या भूमिकेवर प्रश्न उपस्थित केले आहेत. काही सामाजिक कार्यकर्त्यांनी मंदिर परिसरात सुरक्षा वाढवण्याची मागणी करत तातडीने दोषींना ओळखून कारवाई करण्याची गरज व्यक्त केली आहे.
एक वरिष्ठ पोलीस अधिकारी म्हणाले की, “या प्रकारची घटना अतिशय गंभीर असून, आम्ही याची चौकशी प्राधान्याने करत आहोत. हा खरोखर दहशतवादी कट आहे की केवळ कुणाचं असमंजस कृत्य, हे शोधण्याचं काम सुरू आहे. मंदिर आणि भाविकांची सुरक्षा ही आमच्यासाठी सर्वोच्च आहे.”
