जळगाव-लाईव्ह ट्रेंडस न्यूज प्रतिनिधी । जळगाव शहराला लागून असलेल्या निमखेडी शिवारातील साई नगरात एका तरुणाचे बंद घर फोडून चोरट्यांनी सोन्या-चांदीचे दागिने आणि रोख रक्कम असा एकूण २८ हजार रुपये किमतीचा ऐवज चोरून नेल्याची घटना सोमवारी, २१ जुलै रोजी दुपारी २ वाजता उघडकीस आली. याप्रकरणी मंगळवारी, २२ जुलै रोजी जळगाव तालुका पोलीस ठाण्यात अज्ञात चोरट्यांवर गुन्हा दाखल करण्यात आला आहे.
याबाबत मिळालेल्या अधिक माहितीनुसार, नचिकेत सुभाष सोनवणे (वय-२६, रा. साईनगर, निमखेडी शिवार, जळगाव) हा तरुण आपल्या कुटुंबीयांसह राहतो आणि खाजगी सिव्हिल इंजिनिअर म्हणून एका ठिकाणी नोकरी करतो. १९ जुलै ते २१ जुलै या कालावधीत नचिकेतचे घर बंद होते. याच संधीचा फायदा घेत अज्ञात चोरट्यांनी त्याच्या घराच्या दरवाजाचे कडी-कोयंडा तोडून घरात प्रवेश केला.
घरातून चोरट्यांनी सोन्याचे व चांदीचे दागिने आणि रोख रक्कम असा एकूण २८ हजार रुपये किमतीचा ऐवज लंपास केला. ही घटना २१ जुलै रोजी दुपारी २ वाजता समोर आली, जेव्हा नचिकेत सोनवणे यांनी आपले घर पाहिले. त्यानंतर त्यांनी तात्काळ जळगाव तालुका पोलिसांत धाव घेतली. नचिकेत सोनवणे यांनी २२ जुलै रोजी दुपारी ४ वाजता पोलीस ठाण्यात फिर्याद दाखल केली. त्यांच्या तक्रारीवरून अज्ञात चोरट्यांविरोधात गुन्हा नोंदवण्यात आला आहे. या घटनेचा पुढील तपास पोलीस नाईक कैलास इंगळे हे करत आहेत.
