जळगाव-लाईव्ह ट्रेंडस न्यूज प्रतिनिधी । आपल्या विविध प्रलंबित मागण्यांसाठी महाराष्ट्र राज्य परिचारिका संघटनेने मुंबई येथील आझाद मैदानावर धरणे आंदोलन सुरू केले आहे. संघटनेने पुकारलेल्या गुरुवार, १७ जुलै रोजीच्या राज्यव्यापी काम बंद आंदोलनात जळगाव शाखेनेही सक्रिय सहभाग नोंदवला. सकाळी ११ वाजल्यापासून शासकीय वैद्यकीय महाविद्यालयातील परिचारिकांनी काम बंद आंदोलन करून शासनाचा निषेध केला.
जर त्यांच्या मागण्या मान्य झाल्या नाहीत, तर शुक्रवार, १८ जुलैपासून राज्यव्यापी बेमुदत काम बंद आंदोलन करण्यात येईल, असा इशारा संघटनेने दिला आहे, ज्यामुळे आरोग्य सेवेवर मोठा परिणाम होण्याची शक्यता आहे.
महाराष्ट्र राज्य परिचारिका संघटनेच्या प्रमुख मागण्यांमध्ये वेतन त्रुटींचे निवारण, अधिपरिचारिका, परिसेविका आणि पाठ्यनिर्देशिका या पदांवरील कर्मचाऱ्यांचे वेतन प्रश्न सोडवणे, तसेच केंद्र शासनाप्रमाणे नर्सिंग भत्ता आणि गणवेश भत्ता मंजूर करण्याची मागणी आहे. याशिवाय, पात्र परिचारिकांना शैक्षणिक भत्ते मिळावेत आणि केंद्र शासनाप्रमाणे राज्यातील परिचारिकांच्या पदनामांमध्ये बदल करण्यात यावा अशीही त्यांची मागणी आहे.
वैद्यकीय शिक्षण विभागाने निर्गमित केलेल्या कंत्राटी भरती परिपत्रकातून परिचारिकांना वगळून, परिचर्या संवर्गातील १००% कायमस्वरूपी पदभरती, पदनिर्मिती आणि पदोन्नती करण्याची मागणी जोर धरत आहे. वाढलेल्या रुग्णसंख्या व नवीन महाविद्यालयांनुसार नवीन आकृतीबंध मंजूर करणे, परिचारिकांच्या प्रश्नांसाठी स्वतंत्र संचालनालयाची स्थापना करणे आणि सेवाप्रवेश नियमातील लिंगभेद निर्माण करणारे ८०:२० हे स्त्री-पुरुष प्रमाण रद्द करणे या प्रमुख मागण्यांचाही यात समावेश आहे. गेली १२ वर्षे सातत्याने पाठपुरावा करूनही मागण्यांकडे दुर्लक्ष होत असल्याने, आता राज्यव्यापी बेमुदत आंदोलनाचा पवित्रा परिचारिकांनी घेतला आहे.
