मुंबई-लाईव्ह ट्रेंडस न्यूज वृत्तसेवा | उद्यापासून म्हणजेच १ डिसेंबरपासून अनेक नियम बदलणार आहेत, ज्याचा परिणाम देशभरातील कुटुंबांच्या दैनंदिन जीवनावर आणि आर्थिक परिस्थितीवर होणार आहे. पुढील महिन्यात डिसेंबरमध्ये एलजीपी गॅस सिलिंडरच्या किमतीत सुधारणा आणि एसबीआय क्रेडिट कार्डच्या नियमांमध्ये बदलासह अनेक मोठे बदल होणार आहेत.
दर महिन्याच्या १ तारखेला एलपीजी सिलिंडरच्या किंमतीत बदल पाहायला मिळतो. याचा परिणाम देशांतर्गत दरांवर होतो. हे बदल आंतरराष्ट्रीय बाजारपेठेच्या प्रवृत्ती आणि धोरणांद्वारे प्रभावित होतात, संभाव्यत: घरगुती बजेटवर परिणाम करतात. १ डिसेंबरपासून एलपीजी सिलिंडरच्या किंमतीत बदल होण्याची शक्यता आहे. नोव्हेंबर महिन्याच्या सुरुवातीला १९ किलोच्या व्यावसायिक सिलिंडरच्या दरात वाढ करण्यात आली होती. युनिक आयडेंटिफिकेशन अ‍ॅथॉरिटी ऑफ इंडियाने (यूआयडीएआय) आधार डिटेल्समध्ये मोफत अपडेट करण्याची मुदत वाढवली. आधार कार्डधारकांना आता १४ डिसेंबरपर्यंत ऑनलाइन प्रक्रियेद्वारे आपले नाव, पत्ता किंवा जन्मतारीख कोणत्याही शुल्काशिवाय अद्ययावत करता येणार आहे. मात्र, या तारखेनंतर केलेल्या अपडेटवर प्रोसेसिंग फी लागणार आहे.
देशातील सर्वात मोठी सरकारी बँक असलेल्या स्टेट बँक ऑफ इंडियाच्या (एसबीआय) ग्राहकांसाठी क्रेडिट कार्डचे नियम महत्त्वाची बातमी आहे. बँक १ डिसेंबरपासून क्रेडिट कार्डच्या नियमांमध्ये बदल करत आहे. एसबीआय यापुढे डिजिटल गेमिंग प्लॅटफॉर्म व्यवहारांसाठी वापरल्या जाणाऱ्या क्रेडिट कार्डवर रिवॉर्ड पॉईंट्स देणार नाही. याशिवाय, एचडीएफसी बँक देखील १ डिसेंबरपासून आपल्या रेगालिया क्रेडिट कार्ड वापरकर्त्यांसाठी लाउंज अ‍ॅक्सेस नियमांमध्ये बदल करत आहे.
२०२३-२४ (आर्थिक वर्ष २०२४) साठी ३१ जुलैच्या मुदतीपर्यंत प्राप्तिकर विवरणपत्र (आयटीआर) दाखल करण्यात अपयशी ठरलेल्या व्यक्तींना डिसेंबरपर्यंत आपला आयटीआर सादर करण्याची संधी आहे. सुरुवातीची डेडलाइन चुकलेल्यांना आता ३१ डिसेंबरपर्यंत दंड शुल्कासह विलंबित आयटीआर दाखल करता येणार आहे. विलंब शुल्क पाच हजार रुपये आहे. पाच लाख रुपयांपेक्षा कमी उत्पन्न असलेल्या करदात्यांसाठी विलंब शुल्क कमी करून एक हजार रुपये करण्यात आले आहे.
भारतीय दूरसंचार नियामक प्राधिकरण म्हणजेच ट्राय १ डिसेंबर २०२४ रोजी स्पॅम आणि फिशिंग मेसेज कमी करण्याच्या उद्देशाने ट्रेसबिलिटीचे नवे नियम लागू करणार आहे. मात्र, या नियमांमुळे ओटीपी सेवेवर तात्पुरता परिणाम होऊ शकतो. हा नियम लागू झाल्यानंतर ओटीपी डिलिव्हरीला उशीर होणार नाही, असे ट्रायने स्पष्ट केले आहे. मालदीव पुढील महिन्यापासून प्रस्थान शुल्कात वाढ करत आहे. सर्वात लोकप्रिय पर्यटन स्थळांपैकी एक असलेल्या मालदीवने पर्यटकांकडून आकारण्यात येणाऱ्या शुल्कात वाढ केली आहे. इकॉनॉमी क्लासच्या प्रवाशांसाठी ३० डॉलर (२,५३२ रुपये) वरून ५० डॉलर, तर बिझनेस क्लासच्या प्रवाशांसाठी हे शुल्क ६० डॉलरवरून १०,१२९ डॉलरपर्यंत वाढणार आहे. प्रथम श्रेणीतील प्रवाशांना ९० डॉलरऐवजी २४० डॉलर (२०,२५७ रुपये) आणि खासगी जेट प्रवाशांना १२० ते ४८० डॉलर मोजावे लागतील. एअर टर्बाइन इंधनाच्या दरातही १ डिसेंबरपासून बदल होण्याची शक्यता आहे. अशा परिस्थितीत विमानाच्या तिकिटांच्या किमतींवर परिणाम होऊ शकतो.
