भुवनेश्वर-लाईव्ह ट्रेंडस न्यूज वृत्तसेवा | संसदेमध्ये सत्ताधारी भारतीय जनता पार्टीला पाठिंबा देणार नसल्याची घोषणा बिजू जनता दलाने केली आहे. याआधी गेली १० वर्षे बिजू जनता दलाने काही विषयात भाजपाला पाठिंबा दिला होता. बिजू जनता दलाचे प्रमुख व ओडिशाचे माजी मुख्यमंत्री नवीन पटनाईक यांनी सोमवारी २४ जून रोजी आपल्या राज्यसभेच्या नऊ खासदारांबरोबर बैठक घेतली होती. या बैठकीमध्ये त्यांनी हा निर्णय घेतला. त्यांनी आपल्या खासदारांना ओडिशाचे हित जपण्याचा आणि एक मजबूत विरोधक म्हणून काम करण्याचा सल्ला दिला. बिजू जनता दलाचे संसदेच्या वरिष्ठ सभागृहामध्ये म्हणजेच राज्यसभेमध्ये नऊ खासदार आहेत.
२०२४ च्या या लोकसभा निवडणुकीमध्ये बिजू जनता दलाला एकही जागा जिंकता आलेली नाही. ओडिशामध्ये विधानसभा आणि लोकसभा यांच्या निवडणुका समांतरपणे पार पडल्या. सत्ताधारी असूनही लोकसभेसाठी लढविलेल्या २१ जागांपैकी एकही जागा बीजेडीला जिंकता आली नाही आणि राज्यातील सत्ताही गमवावी लागली आहे. या पक्षाचे प्रमुख नवीन पटनाईक २४ वर्षांपासून मुख्यमंत्रिपदावर होते. बिजू जनता दलातील सूत्रांनी दिलेल्या माहितीनुसार, पटनाईक यांनी आपल्या खासदारांना असा संदेश दिला, आता इथून पुढे भाजपाला पाठिंबा द्यायचा नाही. आपण विरोधात राहायचे. गेली १० वर्षे संसदीय राजकारणामध्ये भाजपाच्या पाठीशी ठामपणे उभ्या राहिलेल्या बिजू जनता दलाने राज्यातील सत्ता गमावल्यानंतर आता हा निर्णय घेतला आहे.
