भुसावळ प्रतिनिधी । कैद्याला भेटू देण्याच्या मोबदल्यात दोन हजाराची लाच घेतांना भुसावळ कारागृहातील पोलीस नाईकाला लाचलुचपत विभागाच्या पथकाने रंगेहात पकडले आहे. या कारवाईमुळे भुसावळ परिसरात खळबळ उडाली आहे.
पोलीस पोलीस नाईक अनिल लोटन देवरे असे अटक केलेल्या संशयित आरोपीचे नाव आहे.
याबाबत माहिती अशी की, तक्रारदार यांचे नातेवाईकांविरोधात गुन्हा दाखल असून ते कारागृहात आहे. कैद्याला भेटू देण्यासाठी आरोपी पोलीस नाईक अनिल लोटन देवरे यांनी ३ हजारांची लाच मागितली होती. तडजोड अंती २ हजार रुपये देण्याचे ठरल्यानंतर तक्रारदाराने एसीबीकडे तक्रार नोंदवली व सापळा रचण्यात आला. सोमवारी १५ नोव्हेंबर रोजी दुपारी १ वाजेच्या सुमारास भुसावळ कारागृहात तक्रारदाराकडे देवरे यांनी २ हजारांची लाच स्वीकारताच एसीबीच्या पथकाने रंगेहात पकडले आहे. हा सापळा जळगाव एसीबीचे पोलीस उपअधीक्षक शशीकांत पाटील व पोलीस निरीक्षक संजोग बच्छाव यांच्या नेतृत्वात यशस्वी करण्यात आला. एसीबीच्या ट्रॅपमुळे पोलीस वर्तुळात प्रचंड खळबळ उडाली. शेवटचे वृत्त हाती आले तेव्हा संशयिताविरोधात पोलीसात गुन्हा नोंदविण्याचे काम सुरू होते.
