मुंबई – लाईव्ह ट्रेंड्स न्यूज प्रतिनिधी । राज्यातील पत्रकारांच्या आरोग्य व सामाजिक सुरक्षेसाठी कार्यरत असलेल्या ‘व्हॉईस ऑफ मीडिया’ आणि ‘व्ही.ओ.एम. इंटरनॅशनल फोरम’ने पत्रकार हिताच्या क्षेत्रात ऐतिहासिक पाऊल उचललं आहे. मागील तीन महिन्यांत या संस्थेने तब्बल ८ हजार पत्रकार आणि त्यांच्या ११ हजार कुटुंबीयांचा आरोग्य विमा काढून सामाजिक बांधिलकीचा नवा आदर्श घालून दिला आहे. या योजनेच्या माध्यमातून एकूण १८ हजार पत्रकार संबंधित व्यक्तींची मोफत आरोग्य तपासणी सुद्धा करण्यात आली आहे.
‘व्हॉईस ऑफ मीडिया’ची पंचसूत्री नीती ही पत्रकार आणि त्यांच्या कुटुंबीयांच्या सर्वांगीण सुरक्षेवर लक्ष केंद्रित करते. त्यामध्ये आरोग्य तपासणीपासून ते गंभीर आजारांवरील उपचार, आपत्कालीन परिस्थितीतील मोफत वैद्यकीय मदत अशा अनेक सुविधांचा समावेश आहे. संस्थेचे कार्य इतकं प्रभावी ठरत आहे की, राज्यभरातील अनेक पत्रकारांना या उपक्रमाचा थेट लाभ मिळत आहे.
या उपक्रमात महत्त्वाची भूमिका बजावत आयुष्यमान भारत मिशन महाराष्ट्र समितीचे अध्यक्ष डॉ. ओमप्रकाश शेटे यांनी स्पष्ट केलं की, “व्हॉईस ऑफ मीडियाच्या सदस्य असणाऱ्या प्रत्येक पत्रकारास आम्ही राज्यभरात कोणत्याही मोठ्या रुग्णालयात मोफत उपचार देतो. यामध्ये त्यांच्या कुटुंबीयांचाही समावेश असून, आम्ही त्यांचं आरोग्य हे आमचं उत्तरदायित्व मानतो.”
डॉ. शेटे यांच्या माहितीनुसार, गेल्या दोन वर्षांत संस्थेच्या माध्यमातून पत्रकारांसाठी थेट रुग्णालयांच्या खात्यात १० कोटींहून अधिक रक्कम जमा करण्यात आली आहे. यामध्ये औषधोपचार, मोठ्या शस्त्रक्रिया, हॉस्पिटलायझेशन यांसारख्या सेवा समाविष्ट आहेत.
या कामगिरीत प्रदेशाध्यक्ष अनिल मस्के, महासचिव दिगंबर महाले, कार्याध्यक्ष विजय चोरडिया, मंगेश खाटीक, उपाध्यक्ष अजितदादा कुंकूलोळ आणि राज्यभरातील जिल्हा व तालुकास्तरीय समन्वयकांचा सक्रिय सहभाग असून, राज्यातील विविध भागात आरोग्य कॅम्पचे आयोजन करण्यात आले आहे. यामुळे अनेक कुटुंबांना मोठा दिलासा मिळाला आहे.
मुख्यमंत्री वैद्यकीय सहाय्य कक्षाचे प्रमुख रामेश्वर नाईक यांनी यावर भाष्य करताना सांगितले की, “व्हॉईस ऑफ मीडियाच्या शिफारशीवर दररोज सरासरी ५ ते ६ पत्रकारांच्या आरोग्य प्रकरणांचा निपटारा केला जातो. पत्रकार ही सामाजिक संपत्ती आहे, त्यांचे आरोग्य आणि सुरक्षा आमचं प्राधान्य आहे.”
या योजनेच्या अंमलबजावणीत भारतीय पोस्ट विभागानेही महत्त्वाची भूमिका बजावली असून, वरिष्ठ अधिकारी संजीव भरद्वाज यांनी सांगितलं की, “इतक्या मोठ्या प्रमाणावर संस्थात्मक विमा घेणं ही पहिलीच घटना आहे. ‘व्हॉईस ऑफ मीडिया’ने सामाजिक जबाबदारीचं एक प्रभावी उदाहरण सादर केलं आहे.”
आरोग्य विंगचे प्रमुख भीमेश मुतुला यांनी सांगितलं की, मोठ्या आजारांचे लवकर निदान करून उपचार सुरुवातीच्या टप्प्यावरच सुरू करणे, हे संस्थेचं मुख्य ध्येय आहे. त्यासाठी पुढील महिन्यात राज्यातील २३० तालुक्यांमध्ये विशेष आरोग्य शिबिरं आयोजित करण्यात येणार आहेत, ज्यात ६ हजारांहून अधिक पत्रकार संबंधित व्यक्तींची तपासणी होणार आहे.
या उपक्रमाला अधिक बळ देताना ‘व्हॉईस ऑफ मीडिया’ आणि ‘व्ही.ओ.एम. इंटरनॅशनल फोरम’चे संस्थापक व अध्यक्ष संदीप काळे, कार्याध्यक्ष संजय आवटे, सरचिटणीस चंद्रमोहन पुपाला, दिव्या भोसले, कोषाध्यक्ष चेतन बंडेवार, संघटक अशोक वानखडे, कार्यवाहक शंतनू डोईफोडे यांनी संपूर्ण टीमचे अभिनंदन करून पुढील टप्प्यातही हीच गती आणि सामाजिक संवेदना राखण्याचं आवाहन केलं आहे.
एकूणच, पत्रकारांच्या सामाजिक सुरक्षेसाठी ‘व्हॉईस ऑफ मीडिया’ने उभारलेला आरोग्यविमा आणि आरोग्य तपासणी उपक्रम हा फक्त एक योजना न राहता, एक सामाजिक चळवळ बनली आहे. पत्रकारांना सन्मान, सुरक्षितता आणि आधार देणारा हा उपक्रम इतर क्षेत्रांसाठीही प्रेरणादायक ठरतो आहे.
