जळगाव-लाईव्ह ट्रेंडस न्यूज प्रतिनिधी । शेतजमीन खरेदी-विक्री व्यवहारापोटी रक्कम घेऊनही खरेदी करून न देता बांधकाम व्यावसायिक पियुष कमलकिशोर मणियार (२६, रा. गणेशवाडी) यांची ७० लाख ४८ हजार रुपयांमध्ये फस‌णूक करण्यात आली. हा प्रकार २८ डिसेंबर २०२३ ते १४ जून दरम्यान घडला. या प्रकरणी शहर शुक्रवार १४ जून रोजी रात्री १० वाजता पोलिस ठाण्यात शेतकरी व एजंटविरुद्ध गुन्हा दाखल करण्यात येऊन दोघांना अटक केले आहे.
याबाबत अधिक माहिती अशी की, बांधकाम व्यावसायिक पियुष मणियार यांना शेतजमीन घ्यायची आहे. त्यासाठी रियल इस्टेट एजंट धीरज विजय पाटील (रा. रिंगरोड, जळगाव) याने रवींद्र शांताराम पाटील (रा. शिरसोली, ता. जळगाव) या शेतकऱ्याची शिरसोली प्र.बो. येथील गट क्र. २२३/३मधील शेतजमीन विक्री असल्याचे सांगितले. त्यात मणियार व शेतकरी पाटील यांच्यात सदर जमिनीचा व्यवहार ९० लाख रुपयांमध्ये ठरला. त्यानुसार मणियार यांनी आरटीजीएस व रोखीने एकूण ७० लाख ४८ हजार रुपये दिले. यात सदर व्यवहार पूर्ण करण्याची जबाबदारी धीरज पाटील याची असताना त्याने रजिस्ट्रेशनसाठी शेतकऱ्याला आणले नाही तसेच रक्कमदेखील परत दिली नाही.
व्यवहार पूर्ण होत नसल्याने मणियार यांनी शेतकरी पाटील यास बोलवले असता एजंट पाटील याने पैसे दिले नसल्याने खरेदीखत करून देता येणार नाही, असे शेतकऱ्याने सांगितले. शेतजमीन खरेदी करुन न देता व दिलेली रक्कमही परत मिळत नसल्याने फसवणूक केली म्हणून मणियार यांनी शुक्रवार १४ जून रोजी रात्री १० वाजता शहर पोलिस ठाण्यात फिर्याद दिली. त्यानुसार रवींद्र शांताराम पाटील व धीरज विजय पाटील या दोघांविरुद्ध गुन्हा दाखल करण्यात आला आहे. या दोघंही जणांना अटक करण्यात आले आहे. पुढील तपास पोउनि सर्जेराव क्षिरसागर करीत आहेत.
