मुक्ताईनगर-लाईव्ह ट्रेंड्स न्यूज प्रतिनिधी । शहरालगतच्या हरताळा फाटा परिसरात उड्डाणपुलाच्या कामासाठी ठेवण्यात आलेल्या लोखंडी साहित्याची चोरी झाल्याची धक्कादायक घटना उघडकीस आली आहे. अज्ञात चोरट्यांनी रात्रीच्या अंधाराचा फायदा घेत लोखंडी ट्रसल, अँगल व चॅनल असा सुमारे दीड लाख रुपयांचा माल चोरून नेल्याने व्यापारी व बांधकाम व्यावसायिकांमध्ये भीतीचे वातावरण निर्माण झाले आहे.
हरताळा फाटा येथे उड्डाणपुलालगत सुरू असलेल्या बांधकामासाठी मोठ्या प्रमाणात लोखंडी चॅनल, अँगल व ट्रसल साहित्य साठवून ठेवण्यात आले होते. रात्रीच्या वेळी अज्ञात चोरट्यांनी नियोजनबद्ध पद्धतीने हे साहित्य चोरून नेले. सकाळी संबंधित ठेकेदार व कामगार घटनास्थळी पोहोचले असता साहित्य गायब झाल्याचे लक्षात आले. या प्रकारामुळे परिसरात एकच खळबळ उडाली असून तात्काळ पोलिस ठाण्यात धाव घेऊन घटनेची माहिती देण्यात आली.
चोरी झालेल्या साहित्याची किंमत सुमारे दीड लाख रुपयांच्या घरात असल्याचे प्राथमिक अंदाज व्यक्त करण्यात येत आहे. घटनेची लेखी तक्रार दाखल करण्यात आली असून पोलिसांनी घटनास्थळी भेट देऊन पंचनामा केला आहे. तसेच परिसरातील सीसीटीव्ही कॅमेऱ्यांचे फुटेज तपासून संशयितांचा माग काढण्याचे प्रयत्न सुरू आहेत. चोरट्यांनी वाहनाच्या सहाय्याने साहित्य नेले असावे, असा प्राथमिक अंदाज व्यक्त केला जात आहे.
मुक्ताईनगर शहर व परिसरात गेल्या काही दिवसांत चोरीच्या घटनांमध्ये वाढ झाल्याचे चित्र असून त्यामुळे व्यापारी, नागरिक आणि बांधकाम व्यावसायिकांमध्ये असुरक्षिततेची भावना निर्माण झाली आहे. पोलिसांनी या प्रकरणाचा गांभीर्याने तपास करून चोरट्यांना तातडीने अटक करावी आणि वाढत्या चोरीच्या घटनांना आळा घालावा, अशी मागणी नागरिकांकडून होत आहे.
