बोदवड–लाईव्ह ट्रेंड्स न्यूज प्रतिनिधी । संत गाडगे महाराजांच्या क्रांतिकारी विचारांची उजळणी करत बोदवड दिवाणी व फौजदारी न्यायालयाच्या परिसरात त्यांच्या पुण्यतिथीनिमित्त वैचारिक आणि सामाजिक बांधिलकी जपणारा कार्यक्रम उत्साहात पार पडला. बोदवड वकील संघाच्या पुढाकाराने आयोजित या उपक्रमात “मनाची स्वच्छता हीच खरी भक्ती” हा संदेश केंद्रस्थानी ठेवत ॲड. अर्जुन पाटील यांनी अभ्यासपूर्ण आणि प्रबोधनात्मक भाषणातून उपस्थितांना विचारांची दिशा दिली.
न्यायदेवतेच्या अंगणात स्वच्छतेचा महामंत्र देताना ॲड. पाटील यांनी संत गाडगे महाराज हे केवळ संत नसून समाजपरिवर्तनाचे चालते-फिरते विद्यापीठ असल्याचे प्रतिपादन केले. आजही अनेक सामाजिक वादांचे मूळ अज्ञान, अंधश्रद्धा आणि व्यसनाधीनतेत असल्याचे सांगत महाराजांनी आयुष्यभर कीर्तनाच्या माध्यमातून समाजातील घाण—मनाची आणि परिसराची—साफ केली, हे त्यांनी अधोरेखित केले. कर्ज काढून सण साजरे करण्यापेक्षा मुलांच्या शिक्षणावर खर्च करा, हा महाराजांचा विचार आजही तितकाच प्रेरणादायी असल्याचे त्यांनी स्पष्ट केले.
कार्यक्रमाचे विशेष आकर्षण ठरले ते ‘समतेच्या पंगती’तून दिलेले पिठलं-भाकरीचे प्रसाद वितरण. वकील, न्यायालयीन कर्मचारी, पोलीस प्रशासन आणि पक्षकार यांनी एकत्र बसून पारंपरिक पिठलं-भाकरीचा आस्वाद घेत सामाजिक समतेचा प्रत्यय दिला. दगडाच्या देवाला नैवेद्य देण्यापेक्षा भुकेल्याला भाकरी द्या, हा गाडगे महाराजांचा मूलमंत्र या पंगतीतून साकार झाला.
यावेळी ॲड. अर्जुन पाटील यांनी गाडगे महाराजांच्या ‘दशसूत्री’चा सविस्तर उल्लेख करत जीवनमूल्यांची मांडणी केली. भुकेल्यांना अन्न, तहानलेल्यांना पाणी, उघड्या-नागड्यांना वस्त्र, गरीब मुलामुलींना शिक्षणासाठी मदत, बेघरांना आश्रय, आजारी व अपंगांना औषधोपचार, मुक्या प्राण्यांना अभय, बेकारांना रोजगार, व्यसनमुक्ती आणि कष्टाची भाकरी खाणे—या दहा सूत्रांमधूनच खरा मानवधर्म उलगडतो, असे त्यांनी सांगितले.
वकीलांनीही सामाजिक बांधिलकी जपत न्यायालयात येणाऱ्या शेवटच्या घटकाला न्याय मिळवून देण्यासाठी संवेदनशीलतेने काम करावे, असे आवाहन त्यांनी केले. न्यायालयीन प्रक्रियेत मूल्याधिष्ठित विचारांची गरज अधोरेखित करत त्यांनी अंधश्रद्धा निर्मूलन आणि शिक्षणाचे महत्त्व विशद केले.
या कार्यक्रमास बोदवड वकील संघाचे सचिव ॲड. किशोर महाजन, ज्येष्ठ विधिज्ञ के. एस. इंगळे, उपाध्यक्ष ॲड. धनराज प्रजापती, ॲड. अमोल पाटील, ॲड. सुनील जाधव, ॲड. समीर पिंजारी, व्ही. पी. शर्मा, विजय मंगळकर, एन. ए. लढे, ॲड. सी. के. पाटील, ॲड. शरद दोदानी, ॲड. मिनल अग्रवाल, गोपाल व्यास, रोशन पाटील यांच्यासह न्यायालयीन अधीक्षक वैभव तरटे, प्रशांत कुमार बेदरकर, श्रीराम भट, एस. एस. खेडेकर, एस. के. बेलदार, शिपाई राजू धुंडाळे, वाय. ओ. वंजारी तसेच मोठ्या संख्येने न्यायालयीन कर्मचारी, पोलीस प्रशासन आणि पक्षकार उपस्थित होते.
कार्यक्रमाचे सूत्रसंचालन व आभार ॲड. किशोर महाजन यांनी मानले. गाडगे महाराजांच्या साधेपणाचे प्रतीक असलेल्या पिठलं-भाकरीच्या प्रसादाने कार्यक्रमाची सांगता झाली. वैचारिक जागर, समतेची पंगत आणि मानवी मूल्यांचा सन्मान यामुळे हा उपक्रम बोदवड न्यायालयाच्या इतिहासात स्मरणीय ठरला.
