ब्रिस्बेन-लाईव्ह ट्रेंड्स न्यूज वृत्तसेवा । भारत आणि ऑस्ट्रेलिया यांच्यातील पाचवा आणि अखेरचा टी-२० सामना ब्रिस्बेनच्या गाबा स्टेडियमवर खेळवला जात असताना अचानक वीज चमकल्यामुळे खेळ काही काळासाठी थांबवण्यात आला. भारतीय संघाने पहिल्यांदा फलंदाजी करताना ५२ धावा केल्यावर पाचव्या षटकात पंचांनी सामना थांबवला. मैदानावरील स्क्रीनवर “Play Has Been Suspended Due To Lightning” असा संदेश झळकला आणि त्यानंतर पावसालाही सुरुवात झाली. क्रिकेटमध्ये पावसामुळे सामना थांबवला जातो, हे आपण अनेकदा पाहिलं आहे; मात्र वीज चमकल्याने सामना थांबवला जाणं हे क्वचितच घडतं. या घटनेमुळे पुन्हा एकदा ICC च्या ‘30:30 नियम’ाबद्दल क्रीडाप्रेमींमध्ये उत्सुकता निर्माण झाली आहे.
हा ‘30:30 नियम’ म्हणजे नेमकं काय? क्रिकेटच्या मैदानावर जर वीज चमकली, तर मैदानावरील अधिकारी आणि पंच तात्काळ सावध होतात. जर विजेचा कडकडाट ३० सेकंदांच्या आत ऐकू येत असेल, म्हणजे वीज अंदाजे १० किलोमीटरच्या आत कोसळली आहे, असं मानलं जातं. अशा वेळी खेळाडूंच्या सुरक्षिततेला प्राधान्य देत सामना लगेच थांबवला जातो आणि पुढील ३० मिनिटे कोणतीही वीज दिसली नाही तरच पुन्हा सामना सुरू केला जातो. यालाच “30:30 नियम” म्हटलं जातं.
आंतरराष्ट्रीय क्रिकेट परिषद (ICC) ने खेळाडू आणि प्रेक्षकांच्या सुरक्षेसाठी हा नियम लागू केला आहे. विजेच्या धोक्यामुळे मैदानावर असलेला कोणताही खेळाडू, पंच किंवा अधिकृत अधिकारी जखमी होऊ नये, म्हणून हा प्रोटोकॉल काटेकोरपणे पाळला जातो. माजी आंतरराष्ट्रीय पंच सायमन टॉफेल यांनी एका क्रीडा कार्यक्रमात या नियमाविषयी माहिती देताना सांगितलं होतं की, “वीज हे पावसापेक्षाही अधिक धोकादायक नैसर्गिक संकट आहे. त्यामुळे सुरक्षित अंतर राखणं आणि वेळेवर खेळ थांबवणं आवश्यक आहे.”
या नियमाची अंमलबजावणी क्रिकेटच्या मैदानात फार कमी वेळा पाहायला मिळते. मात्र भारत आणि ऑस्ट्रेलिया यांच्यातील चालू टी-२० मालिकेतच नव्हे, तर २०२४ मधील ब्रिस्बेन कसोटी सामन्यात देखील याच नियमानुसार खेळ थांबवण्यात आला होता. गाबा स्टेडियममध्ये विजांचा प्रकोप वारंवार होतो, म्हणून तिथे हा नियम विशेष काटेकोरपणे पाळला जातो.
या नियमामुळे जरी सामना काही काळ थांबतो, तरी खेळाडूंच्या सुरक्षिततेसाठी तो आवश्यक ठरतो. त्यामुळे आजच्या या सामन्यात वीज चमकल्यानंतर खेळ थांबवण्याचा निर्णय योग्य ठरल्याचं सर्व स्तरातून मान्य करण्यात आलं आहे.
