पुणे–लाईव्ह ट्रेंड्स न्यूज वृत्तसेवा । महाराष्ट्र राज्य माध्यमिक व उच्च माध्यमिक शिक्षण मंडळाने फेब्रुवारी-मार्च २०२६ मध्ये होणाऱ्या दहावी आणि बारावी शालांत परीक्षांचे अंतिम वेळापत्रक जाहीर केले आहे. या वेळापत्रकानुसार बारावीची लेखी परीक्षा मंगळवार, १० फेब्रुवारीपासून सुरू होऊन बुधवार, १८ मार्च २०२६ पर्यंत, तर दहावीची परीक्षा शुक्रवार, २० फेब्रुवारीपासून सुरू होऊन बुधवार, १८ मार्च २०२६ पर्यंत चालणार आहे. विद्यार्थ्यांना हे सविस्तर वेळापत्रक मंडळाच्या अधिकृत संकेतस्थळावर www.mahahsscboard.in येथे पाहता येईल.
राज्य शासन आणि शिक्षण मंडळाकडून यावर्षीही परीक्षा वेळेत घेऊन मार्चच्या मध्यापर्यंत पूर्ण करण्याचे नियोजन करण्यात आले आहे, जेणेकरून दहावी नंतरच्या पॉलिटेक्निक, आयटीआय तसेच बारावी नंतरच्या विविध व्यावसायिक अभ्यासक्रमांच्या प्रवेश प्रक्रिया वेळेत पूर्ण होतील आणि विद्यार्थ्यांचे शैक्षणिक वर्ष लवकर सुरू होईल. हा प्रयत्न मागील वर्षाप्रमाणेच यंदाही कायम ठेवण्यात आला आहे.
बारावीच्या प्रायोगिक, श्रेणी, तोंडी आणि अंतर्गत मूल्यांकन परीक्षा शुक्रवार, २३ जानेवारी २०२६ ते सोमवार, ९ फेब्रुवारी २०२६ या कालावधीत घेण्यात येणार आहेत. या कालावधीत विज्ञान शाखेच्या प्रायोगिक परीक्षा, वाणिज्य शाखेच्या प्रोजेक्ट मूल्यांकन आणि कला शाखेच्या तोंडी परीक्षा पार पडतील.
तर दहावीच्या प्रायोगिक आणि तोंडी परीक्षा सोमवार, २ फेब्रुवारी २०२६ ते बुधवार, १८ फेब्रुवारी २०२६ दरम्यान पार पडतील. या काळात शारीरिक शिक्षण, आरोग्यशास्त्र, गृहशास्त्र आणि कला विषयांच्या मूल्यांकन परीक्षा शाळास्तरावर घेण्यात येणार आहेत. विद्यार्थ्यांसाठी विषयवार वेळापत्रक आणि सर्व सूचना मंडळाच्या संकेतस्थळावर उपलब्ध आहेत, अशी माहिती मंडळाचे सचिव दीपक माळी यांनी दिली.
दरम्यान, मंडळाने विद्यार्थ्यांसाठी नोंदणी अर्ज क्रमांक १७ सादर करण्यासंबंधी महत्त्वाची सूचनाही जाहीर केली आहे. अतिविलंब शुल्कासह अर्ज भरण्याचा कालावधी १ नोव्हेंबर ते ३० नोव्हेंबर २०२५ असा निश्चित करण्यात आला आहे. या कालावधीत अर्ज सादर न करणाऱ्या विद्यार्थ्यांचे अर्ज नंतर स्वीकारले जाणार नाहीत. अतिविलंब शुल्क प्रति विद्यार्थी प्रति दिवस २० रुपये आकारण्यात येईल, असेही मंडळाने स्पष्ट केले आहे.
