जयपूर : वृत्तसंस्था । राजस्थानातील अशोक गेहलोत सरकार पुन्हा एकदा संकटात अडकण्याची चिन्हं आहेत. मंत्रिमंडळ विस्तारासाठी उपमुख्यमंत्री सचिन पायलट गटानं आक्रमक पवित्रा घेतलाय.
जुलैपर्यंत मंत्रिमंडळ विस्तार करा अन्यथा पुढचा स्वतंत्र मार्ग पतक्रण्यासाठी आपण तयार असल्याचं पायलट गटाचं म्हणणं आहे. तसा अल्टिमेटमचं पायलट गटानं गेहलोत सरकारला दिला आहे. यावेळेस गेहलोत सरकारची चिंता वाढण्याचं कारण म्हणजे, गेहलोत गटाचे काही आमदारही पायलट गटाच्या संपर्कात असल्याचं समजतंय. त्यामुळे गेहलोत गटातही खळबळ उडालीय.
११ जून रोजी सचिन पायलट यांचे वडील आणि माजी केंद्रीय मंत्री राजेश पायलट यांची पुण्यतिथी आहे. या निमित्तानं दरवर्षी या निमित्तानं दौसाच्या भंडाना इथं सर्व धर्म प्रार्थना सभा आणि पुष्पांजली कार्यक्रम आयोजित केला जातो. गेल्या वर्षी याच कार्यक्रमात बंडखोरीच्या कार्यक्रमाची रुपरेषा ठरली होती, असं सजमलं जातं. यंदाच्या कार्यक्रमातही असं काही होणार का? याची शक्यता गेहलोत सरकारकडून तपासली जातेय.
११ जून रोजी काँग्रेसकडून महागाईविरोधात आंदोलन करण्यात येणार आहे. राज्यातील पेट्रोल पंपांवर करण्यात येणाऱ्या या आंदोलनात पक्षाचे पदाधिकारी आणि नेते सहभागी होण्याची शक्यता आहे.
गेल्या दोन दिवसांत डझनभराहून अधिक आमदारांच्या सचिन पायलट यांच्या घरी वेगवेगळ्या बैठकी पार पडल्याचंही समोर येतंय. पक्षाध्यक्ष सोनिया गांधी, माजी अध्यक्ष राहुल गांधी आणि महासचिव प्रियांका गांधी वाड्रा यांची पुढच्या महिन्यात भेट घेण्याचाही या गटाचा प्रयत्न आहे.
काँग्रेस राष्ट्रीय महासचिव भंवर जितेंद्र सिंह हेदेखील सचिन पायटल यांच्या समर्थनार्थ पुढे आले आहेत. पक्षाच्या नेतृत्वानं दिलेली आश्वासनं पूर्ण करून पायलट गटाला संतुष्ट करावं, असं त्यांचं म्हणणं आहे. मात्र, राज्यात मुख्यमंत्री बदलण्याची किंवा सरकारला कोणताही धोका असल्याची शक्यता मात्र त्यांनी फेटाळून लावलीय. भंवर जितेंद्र सिंह आसाममध्ये काँग्रेसचे प्रभारी आहेत. तसंच मनमोहन सिंह यांच्या कार्यकाळात ते केंद्रीय मंत्रीही होते.
गेल्या वर्षीही ऑगस्ट महिन्यात सचिन पायलट यांच्या नेतृत्वात राजस्थानच्या अनेक काँग्रेस आमदारांनी मुख्यमंत्री अशोक गेहलोत यांच्याविरुद्ध रणशिंग फुंकलं होतं. त्यावेळी दोन्ही गटाच्या नेते अनेक दिवस हॉटेलमध्ये बंद होते. परंतु, पक्ष नेतृत्व मात्र पायलट यांचं मन वळवण्यात यशस्वी ठरलं होतं
