मुंबई : वृत्तसंस्था । कोरोनातून बरे झालेल्या रुग्णांमध्ये सध्या गुलियन बॅरी सिंड्रोम हा श्वसनाशी संबंधित दुर्मिळ आजार आढळून येत आहे. मुंबईतील एका महिलेला गुलियन बॅरी सिंड्रोम हा आजार असल्याचे निदान झाले होते.
कोरोनामुक्त रुग्णाला हा आजार होणे ही दुर्मिळ बाब असल्याचे निरीक्षण डॉक्टरांनी नोंदवले आहे. न्यूरोलॉजिस्ट डॉ. पंकज अग्रवाल यांच्या नेतृत्वाखाली या महिलेवर यशस्वी उपचार करण्यात आले आहेत.
माधवी यांचे वय ४९ वर्षे असून, त्या महाडमध्ये राहतात. या महिलेला कोरोनाची लागण झाली होती. या आजाराची सौम्य लक्षणे असल्याने या महिलेवर व तिच्या पतीवर घरीच उपचार करण्यात आले. मात्र, तीन आठवड्यानंतर त्यांना पाठदुखीचा त्रास सुरू झाला. ऑर्थोपेडिक सर्जनद्वारे औषधोपचार सुरू होते. पण, काही दिवसांनी चेहऱ्याच्या एका बाजूला पक्षाघात झाला. या महिलेला चालताही येत नव्हते. प्रकृती बिघडत असल्याने डॉक्टरांच्या सल्ल्यानुसार कुटुंबीयांनी तिला मुंबईतील खासगी रुग्णालयामध्ये दाखल केले.
न्यूरोलॉजिस्ट डॉ. पंकज अग्रवाल यांनी सांगितले की, या महिलेला चालता येत नसल्याने व्हीलचेअरवर रुग्णालयात आणले होते. चेहऱ्यावर अशक्तपणा जाणवत होता, हातांनी काहीही पकडता येत नव्हते. बोलताना शब्दही स्पष्ट उच्चारता येत नव्हते. अशा स्थितीत या महिलेची वैद्यकीय चाचणी करण्यात आली.
या चाचणी अहवालात महिलेला गुलियन बॅरी सिंड्रोम हा विकार असल्याचे निष्पन्न झाले. या विकारामध्ये रोगप्रतिकारशक्ती कमकुवत होत असल्यामुळे संसर्गजन्य आजाराची पटकन लागण होते. परंतु, हा आजार रोगप्रतिकारक शक्तीने केलेल्या हल्ल्यामुळे होतो. मज्जातंतू हळूहळू निकामी करून या आजाराचा विषाणू बोट, पाय, हात आणि फुफ्फुसे तसेच श्वसननलिकेवरही हल्ला चढवतो. अशा रुग्णांची अवस्था पक्षाघात म्हणजे लकवा आल्यासारखी होते. हा आजार कोणत्याही प्रकारच्या विषाणू संसर्गामुळे होऊ शकतो, असेही डॉ. अग्रवाल यांनी सांगितले.
रोगप्रतिकारशक्ती वाढण्यासाठी इंजेक्शनचा कोर्स पाच दिवस दिला जातो. या उपचारानंतर दहा दिवसांनी रुग्ण घरी जाऊ शकतो.गुलियन बॅरी सिंड्रोम हा आजार मेंदू, हृदय, मूत्रपिंड आणि फुफ्फुस या अवयवांवर परिणाम करतो.
. ग्लोबल रुग्णालयात मागील चार महिन्यांत असे तीन रुग्ण समोर आले आहेत. मुंबईतील न्यूरोलॉजिस्टकडे आत्तापर्य़ंत असे ५ रुग्ण आले आहेत, असेही डॉ. अग्रवाल यांनी सांगितले.
