जळगाव /रावेर – लाईव्ह ट्रेंड्स न्यूज प्रतिनिधी । राज्यातील स्थानिक स्वराज्य संस्थांच्या निवडणुकांच्या पार्श्वभूमीवर अत्यंत महत्त्वपूर्ण टप्पा ठरलेली जिल्हा परिषद (जि.प.) आणि पंचायत समिती (पं.स.) आरक्षण सोडत येत्या सोमवारी (१३ ऑक्टोबर) रोजी पार पडणार आहे. राज्य निवडणूक आयोगाने याबाबतची अधिकृत घोषणा करत राजकीय घडामोडींना वेग दिला आहे.
आरक्षण सोडतीत अनुसूचित जाती, अनुसूचित जमाती, महिला आणि इतर मागासवर्गीय घटकांसाठी जागांचे आरक्षण निश्चित करण्यात येईल. या प्रक्रियेनंतर जिल्हा परिषद व पंचायत समिती निवडणुकांचा कार्यक्रम अंतिम टप्प्यात जाण्याची शक्यता आहे. राज्यभरातून राजकीय पक्ष आणि इच्छुक उमेदवार या सोडतीकडे अत्यंत उत्सुकतेने पाहत आहेत.
आरक्षण सोडतीसाठी राज्य निवडणूक आयोगाने सर्व जिल्हाधिकाऱ्यांना आवश्यक निर्देश दिले असून, पारदर्शक व संगणकीकृत पद्धतीने ही प्रक्रिया पार पाडली जाणार आहे. यासाठी संबंधित जिल्ह्यांमध्ये आरक्षण सोडत आयोजित करण्याची तयारी सुरु झाली आहे.
आरक्षण सोडतीनंतर निवडणुकीतील प्रत्येक मतदारसंघासाठी कोणत्या प्रवर्गाचे आरक्षण लागू होणार, हे स्पष्ट होईल. त्यामुळे अनेक इच्छुकांच्या राजकीय गणितांमध्ये मोठे बदल होण्याची शक्यता आहे. काही ठिकाणी जागा खुली राहणार की आरक्षित, यावर उमेदवारी आणि पक्षाचे तिकीट वाटप ठरणार आहे.
राज्यातील अनेक जिल्ह्यांमध्ये सध्या स्थानिक राजकारण तापले असून, निवडणुकांच्या पार्श्वभूमीवर पक्षांतर्गत हालचाली वेग घेतील, असे चित्र दिसत आहे. आरक्षण सोडतीनंतर निवडणुकीसाठी रणनीती आखण्यात राजकीय पक्ष पूर्ण ताकदीनिशी उतरतील, हे निश्चित आहे.
जिल्हा परिषद व पंचायत समित्यांच्या निवडणुकीसाठी १३ ऑक्टोबरला होणारी आरक्षण सोडत हा एक निर्णायक टप्पा ठरणार असून, यानंतर निवडणुकीचा बिगुल अधिकृतपणे वाजणार, अशी शक्यता आहे.
