जळगाव-लाईव्ह ट्रेंडस न्यूज प्रतिनिधी । मुंबईवरून अमरावतीसाठी आयशर वाहन घेवून जात असतांना मालेगाव येथील चाळीसगाव चौफुलीजवळ झालेल्या अपघातात जळगावातील सुप्रीम कॉलनीतील तरुणाचा उपचारादरम्यान मृत्यू झाल्याची घटना गुरूवारी २५ जुलै रोजी सकाळी ७ वाजता घडली आहे. याप्रकरणी सकाळी ११ वाजता शनिपेठ पोलीस ठाण्यात अकस्मात मृत्यूची नोंद करण्यात आली. गोकुळ सुभाष चांदेकर (वय-२५, रा. सुप्रीम कॉलनी, जळगाव) असे मयत झालेल्या तरुणाचे नाव आहे.
यासंदर्भात मिळालेली माहिती अशी की, गोकुळ चांदेकर जळगाव शहरातील सुप्रिम कॉलनीत वास्तव्याला होते. १७ जुलै रोजी (एमएच १९ सीवाय ८८४६) या आयशर क्रमांकच्या वाहनावरून मुंबईवरून अमरावतीसाठी जाण्यासाठी निघाला होता. दरम्यान दुपारी दीड वाजेच्या सुमारास मालेगाव येथील चाळीसगाव चौफुलीवर त्याच्या आयशर वाहनाचा अपघात झाला. या अपघातात गोकुळ चांदेकर हा गंभीर जखमी झाला. त्यामुळे त्याला मालेगाव येथील खासगी रूग्णालयात दाखल करण्यात आले होते. त्यांच्या वर पुढील उपचारासाठी जळगाव येथील शासकीय वैद्यकीय महाविद्यालयात १९ जुलै रोजी रात्री ८.३० वाजता दाखल करण्यात आले होते. त्याच्यावर उपचार सुरू असताना गुरुवारी २५ जुलै रोजी सकाळी ७ वाजता मृत्यू झाला. दरम्यान या घटनेची माहिती मिळाल्यानंतर नातेवाईक आणि मित्र परिवारांनी शासकीय वैद्यकीय महाविद्यालयात गर्दी केली होती. याबाबत शनीपेठ पोलीस ठाण्यात अकस्मात मृत्यूची नोंद करण्यात आले. या घटनेचा पुढील तपास पोलीस हेडकॉन्स्टेबल युवराज कोडी हे करीत आहे.
