फैजपूर (प्रतिनिधी) रावेर विधानसभा मतदार संघाची अंतिम मतदार यादी प्रसिध्द करण्यात आली आहे. या विधानसभा मतदार संघातील मतदारांनी आपले नाव मतदार यादीत असल्याची खात्री करावी, असे आवाहन रावेर विधानसभा मतदार संघाचे मतदार नोंदणी अधिकारी डॉ. अजित थोरबोले यांनी केले आहे.
रावेर लोकसभा मतदार संघात सार्वत्रिक निवडणूक 2019 मध्ये एकुण 2 लाख 97 हजार 152 इतके मतदार होते. त्यामध्ये पुरुष मतदार 1 लाख 54 हजार 537 व स्त्री मतदार 1 लाख 42 हजार 614 इतके होते. लोकसभा सार्वत्रिक निवडणूकीनंतर विशेष संक्षिप्त पुनरिक्षण कार्यक्रम-2 राबविण्यात आला. या कार्यक्रमातंर्गत 2 हजार 34 इतक्या नवमतदारांची नोंदणी करण्यात आली असुन 6 हजार 468 मतदारांची वगळणी करण्यात आली आहे. त्यात मयत 4 हजार 836, दुबार 984 व स्थलांतरीत 648 असे मतदार आहे. 31 ऑगस्ट, 2019 रोजी प्रसिद्ध झालेल्या अंतिम मतदार यादीनुसार रावेर विधानसभा मतदार संघाची एकुण मतदार संख्या 2 लाख 92 हजार 763 इतकी आहे. त्यात पुरुष मतदार 1 लाख 51 हजार 786 इतके असुन, स्त्री मतदार 1 लाख 40 हजार 977 इतके आहे.
सर्व यादी भागाच्या मतदार याद्या त्या-त्या यादी भागाच्या मतदान केंद्रस्तरीय अधिकारी (BLO) यांचेकडे प्रसिद्धी कामी देण्यात आलेल्या आहेत. सर्व मतदारांनी आपआपल्या यादी भागाच्या मतदान केंद्रस्तरीय अधिकारी (BLO) यांचेकडे संपर्क साधावा. अथवा Voter Helpline App द्वारे आपले नांव मतदार यादीमध्ये आहे किंवा नाही याची खात्री करुन घ्यावी. जेणेवरुन कुठलाही मतदार हा विधानसभा निवडणुक- 2019 मध्ये आपल्या मतदानाच्या मुलभूत अधिकारापासून वंचीत राहणार नाही. असे डॉ. अजित थोरबोले, मतदार नोंदणी अधिकारी रावेर विधानसभा मतदार संघ यांनी एका प्रसिध्दी पत्रकान्वये कळविले आहे.
