भुसावळ-लाईव्ह ट्रेंड्स न्यूज प्रतिनिधी । शहरातील वासुदेव जेष्ठ नागरिक संघाच्या वतीने जेष्ठ नागरिकांसाठी आरोग्यविषयक शासकीय योजनांचा लाभ मिळावा या उद्देशाने विशेष उपक्रम राबविण्यात आला. या उपक्रमांतर्गत जेष्ठ सभासदांना आभा (ABHA) कार्ड व आयुष्मान कार्ड तयार करून देण्यात आले तसेच रेशन कार्डवरील १२ अंकी क्रमांकासाठी नोंदणीची प्रक्रिया करण्यात आली. या उपक्रमाला शहरातील जेष्ठ नागरिकांचा उत्स्फूर्त प्रतिसाद लाभला.
जेष्ठ नागरिकांना शासकीय आरोग्य योजनांचा लाभ सहज उपलब्ध व्हावा आणि त्यांना डिजिटल आरोग्य व्यवस्थेची माहिती मिळावी या उद्देशाने वासुदेव जेष्ठ नागरिक संघाचे संयोजक डॉ. नितु पाटील यांच्या पुढाकारातून हा उपक्रम आयोजित करण्यात आला. मागील दोन शनिवार सभासदांची नोंदणी व आवश्यक कागदपत्रांची तपासणी करण्यात आली होती. त्यानंतर आज आयोजित कार्यक्रमात उपस्थित जेष्ठ सभासदांना आभा कार्ड आणि आयुष्मान कार्ड तयार करून देण्यात आले.
या कार्यक्रमात अनेक जेष्ठ नागरिकांच्या रेशन कार्डवरील १२ अंकी क्रमांकासाठी नोंदणीची प्रक्रिया देखील करण्यात आली. त्यामुळे शासकीय योजनांचा लाभ मिळवताना होणाऱ्या अडचणी दूर होण्यास मदत होणार असल्याचे सांगण्यात आले. जेष्ठ नागरिकांना या योजनांची माहिती देत त्यांना भविष्यातील आरोग्यसेवेसाठी या कार्डांचे महत्त्व पटवून देण्यात आले.
यावेळी डॉ. नितु पाटील यांनी उपस्थित सभासदांना आभा आणि आयुष्मान योजनांविषयी सविस्तर माहिती दिली. आभा कार्डमुळे नागरिकांचे सर्व आरोग्यविषयक रेकॉर्ड डिजिटल स्वरूपात सुरक्षित ठेवता येतात. तसेच आयुष्मान कार्डच्या माध्यमातून गरीब व गरजू कुटुंबांना दरवर्षी पाच लाख रुपयांपर्यंत मोफत उपचाराची सुविधा उपलब्ध होत असल्याचे त्यांनी सांगितले. देशातील आरोग्यसेवा अधिक जलद, सुरक्षित आणि आधुनिक बनविण्यात या कार्डांची महत्त्वपूर्ण भूमिका असल्याचेही त्यांनी स्पष्ट केले.
या उपक्रमाच्या यशस्वी आयोजनासाठी वासुदेव जेष्ठ नागरिक संघाचे पदाधिकारी प्रकाश पाटील, सतीश जंगले, धनराज पाटील, गणेश सरोदे, भानुदास पाटील आणि संजय चौधरी यांनी विशेष परिश्रम घेतले. कार्यक्रमादरम्यान उपस्थित जेष्ठ नागरिकांनी या उपक्रमाबद्दल समाधान व्यक्त करत भविष्यातही अशा प्रकारचे उपक्रम राबविण्याची अपेक्षा व्यक्त केली.
