जळगाव-लाईव्ह ट्रेंडस न्यूज प्रतिनिधी । महानगरपालिका निवडणुकीच्या रणधुमाळीत रविवारी ४ जानेवारी रोजी सकाळी १० वाजता शिवसेना (उद्धव बाळासाहेब ठाकरे) गटाने आपल्या प्रचाराचा अधिकृत श्रीगणेशा केला. प्रभाग क्रमांक ८ आणि १० मधील एकूण ८ उमेदवारांच्या प्रचाराचा नारळ पिंप्राळा येथील जागृत ‘कष्टभजन हनुमान मंदिर’ येथे फोडण्यात आला. यावेळी कार्यकर्त्यांचा उत्साह आणि भगव्या झेंड्यांनी पिंप्राळा परिसर दुमदुमून गेला होता.
शक्तिप्रदर्शन आणि महापुरुषांना वंदन:
हनुमान मंदिरात मनोभावे दर्शन घेतल्यानंतर उमेदवारांनी उपस्थित जनसमुदायाला संबोधित केले. त्यानंतर भारतीय राज्यघटनेचे शिल्पकार डॉ. बाबासाहेब आंबेडकर आणि आराध्य दैवत छत्रपती शिवाजी महाराज यांच्या स्मारकाला पुष्पहार अर्पण करून अभिवादन करण्यात आले. यानंतर काढण्यात आलेल्या भव्य रॅलीतून उबाठा शिवसेनेने मोठे शक्तिप्रदर्शन करत विरोधकांना आव्हान दिले.
दिग्गजांची उपस्थिती:
या प्रचार शुभारंभाप्रसंगी जिल्हाप्रमुख कुलभूषण पाटील, चंद्रकांत कापसे, गजानन मालपुरे यांच्यासह पक्षाचे अनेक पदाधिकारी उपस्थित होते. रॅलीमध्ये प्रभाग ८ आणि १० मधील महिला, पुरुष आणि तरुणांची मोठी गर्दी पाहायला मिळाली. मतदारांशी थेट संवाद साधत उमेदवारांनी विजयाचा निर्धार व्यक्त केला.
निवडणूक वातावरण तापले:
चिन्ह वाटपानंतर आता प्रचाराला खऱ्या अर्थाने वेग आला आहे. पोलिसांनी शहरात आधीच कोंबिंग ऑपरेशन आणि गुन्हेगारांच्या हद्दपारीचे आदेश देऊन कडक सुरक्षा तैनात केली आहे. या शांततापूर्ण पण आक्रमक वातावरणात उबाठा शिवसेनेने पिंप्राळा भागातून निवडणुकीत आघाडी घेतल्याचे चित्र पाहायला मिळत आहे.
