जळगाव-लाईव्ह ट्रेंडस न्यूज प्रतिनिधी । राज्य शासनाच्या गृह विभागाने गुरुवारी ३१ जुलै सायंकाळी ६ वाजता पोलीस उपअधीक्षक आणि सहाय्यक पोलीस आयुक्त संवर्गातील अधिकाऱ्यांच्या बदल्यांचे आदेश जारी केले. या आदेशानुसार, जळगाव जिल्ह्यातील तीन महत्त्वाच्या उपविभागांना नवीन अधिकारी मिळाले आहेत. जळगाव शहर विभागाचे उपअधीक्षक संदीप गावित यांची भुसावळ उपविभागात बदली करण्यात आली आहे.
प्रशासकीय कारणास्तव करण्यात आलेल्या या बदल्यांमध्ये राज्य पोलीस सेवेतील (रा.पो.से.) एकूण ६५ अधिकाऱ्यांचा समावेश आहे. जळगाव शहरातून संदीप गावित यांची भुसावळ येथे बदली झाली असताना, जिल्ह्याला बाहेरून दोन नवीन उपअधीक्षक मिळाले आहेत.
विजयकुमार ठाकूरवाड यांची चाळीसगाव उपविभागाचे पोलीस अधिकारी म्हणून नियुक्ती करण्यात आली आहे. तर, बापू रोहोम हे मुक्ताईनगर उपविभागीय पोलीस अधिकारी म्हणून जबाबदारी स्वीकारणार आहेत.
या बदल्यांमुळे जिल्ह्यातील पोलीस प्रशासनात काही प्रमाणात फेरबदल होणार असून, नवीन अधिकारी आपापल्या कार्यक्षेत्रात कायदा व सुव्यवस्था राखण्यासाठी आणि गुन्हेगारी नियंत्रणासाठी प्रयत्न करतील अशी अपेक्षा आहे. गृह विभागाच्या या निर्णयामुळे प्रशासकीय कामकाजात अधिक गती येईल, असे मानले जात आहे.
