जळगाव-लाईव्ह ट्रेंड्स न्यूज प्रतिनिधी । जळगाव शहरातील का. ऊ. कोल्हे विद्यालयाच्या मागील भागातील दशरथ नगर येथे पारंपरिक उत्साह, भक्तीभाव आणि सामाजिक एकतेचे दर्शन घडवणारा तुलसी विवाह सोहळा मोठ्या उत्साहात पार पडला. ५ नोव्हेंबर रोजी झालेल्या या कार्यक्रमात रहिवाशांनी एकत्र येऊन धार्मिक विधी, आरती, भजन आणि प्रसाद वितरण करत सामाजिक सौहार्दाचे उत्कृष्ट उदाहरण साकारले.
दशरथ नगर परिसरातील नागरिक दरवर्षीप्रमाणे यंदाही पारंपरिक सण एकत्र येऊन साजरा करण्याच्या उद्देशाने एकत्र आले. “एकत्र येऊन सण साजरा करा, समाजात ऐक्य राखा” हा संदेश या उपक्रमातून देण्यात आला. नागरिकांच्या स्वयंप्रेरणेने साकारलेला हा तुलसी विवाह सोहळा केवळ धार्मिक सोहळा न ठरता सामाजिक बंध वाढविणारा एक स्नेहमेळा ठरला.
या उपक्रमात परिसरातील सर्वच रहिवाशांनी उत्साहाने सहभाग घेतला. समाजकार्यात नेहमी आघाडीवर असलेल्या रस्ते वाहतूक आणि महामार्ग विभागातील सुभाष राऊत, जिल्हा न्यायालयातील प्रकाश सपकाळ, जिल्हा परिषदेत कार्यरत विजय पाटील तसेच शैलेंद्र ठाकूर, मंगेश ठाकूर, किशोर कोळी, रतन माळी, दीपक पाटील आदींनी या सोहळ्याचे आयोजन आणि नियोजनात पुढाकार घेतला. त्यांच्या सौभाग्यवतींच्या संकल्पनेतून या धार्मिक उपक्रमाला आकार देण्यात आला.
तुलसी विवाहासारख्या पारंपरिक सणांमधून समाजात संस्कार, श्रद्धा आणि एकतेचे बीज रुजावे, हा या कार्यक्रमाचा मूलभूत हेतू होता. दरवर्षीप्रमाणे या वर्षीही रहिवाशांनी सामाजिक आणि सांस्कृतिक सलोखा जपण्याचा प्रयत्न केला. या सोहळ्यामुळे परिसरात आनंद, भक्तीभाव आणि परस्पर सौहार्दाचे वातावरण निर्माण झाले असून रहिवाशांच्या एकतेचा हा उपक्रम सर्वत्र कौतुकास पात्र ठरला आहे.
दशरथ नगरातील या सणसोहळ्याने समाजातील लोकांना एकत्र आणून ‘सामाजिक एकोपा’ आणि ‘संस्कृती संवर्धन’ यांचे महत्त्व अधोरेखित केले. नागरिकांच्या उत्साहाने आणि एकतेने सजलेला हा तुलसी विवाह सोहळा समाजात ऐक्य आणि सौहार्दाचा आदर्श ठरला आहे.
