पुणे-वृत्तसेवा । महाराष्ट्राचे उपमुख्यमंत्री अजित पवार यांचे बुधवारी एका दुर्दैवी विमान अपघातात निधन झाले. या घटनेने संपूर्ण महाराष्ट्रात शोककळा पसरली असून राज्याच्या राजकारणात मोठी पोकळी निर्माण झाली आहे. मुंबईहून बारामतीकडे जात असताना त्यांचे खासगी विमान धावपट्टीवर उतरण्यापूर्वीच कोसळले आणि या भीषण दुर्घटनेत अजित पवारांसह विमानातील इतर चार जणांचाही अंत झाला.
या अपघाताचे गांभीर्य लक्षात घेऊन केंद्र सरकारने तातडीने चौकशीचे आदेश दिले आहेत. ‘विमान अपघात तपास ब्यूरो’ या संस्थेने घटनास्थळी पोहोचून तपासाला सुरुवात केली आहे. तपास यंत्रणांनी अपघातग्रस्त विमानाचा ‘ब्लॅकबॉक्स’ ताब्यात घेतला असून, त्यातील माहितीवरून अपघाताचे नेमके तांत्रिक कारण स्पष्ट होणार आहे. मुख्यमंत्री देवेंद्र फडणवीस यांनी केंद्रीय नागरी उड्डाण मंत्री किंजरापु राममोहन नायडू यांना पत्र लिहून या घटनेच्या सखोल चौकशीची मागणी केली होती. त्या पत्राची दखल घेत केंद्राने हा तपास पारदर्शक आणि कालबद्ध पद्धतीने पूर्ण करण्याचे आश्वासन दिले आहे.
केंद्रीय मंत्री राममोहन नायडू यांनी दिलेल्या माहितीनुसार, अपघाताच्या वेळी बारामती परिसरात दृश्यमानता (Visibility) अत्यंत कमी होती. विमानाचा तांत्रिक रेकॉर्ड, ऑपरेशनल तपशील आणि प्रत्यक्षदर्शींची माहिती या सर्वांची पडताळणी केली जात आहे. तपासाचा अंतिम अहवाल येताच तो राज्य सरकारला सादर केला जाईल, जेणेकरून भविष्यात व्हीव्हीआयपी प्रवासाच्या वेळी अधिक सुरक्षा उपाययोजना अंमलात आणता येतील.
आज बारामती येथील विद्या प्रतिष्ठानच्या प्रांगणात अजित पवार यांच्यावर शासकीय इतमामात अंत्यसंस्कार करण्यात आले. यावेळी लाखोंचा जनसागर लोटला होता. ‘दादा’ अशा प्रकारे सोडून जातील, यावर कोणाचाही विश्वास बसत नव्हता. उपस्थित प्रत्येक कार्यकर्त्याच्या डोळ्यात अश्रू होते. राज्याच्या प्रशासनावर जबरदस्त पकड असलेला आणि जनसामान्यांच्या कामांसाठी सदैव तत्पर राहणारा एक कणखर नेता हरपल्याची भावना सर्व स्तरांतून व्यक्त होत आहे.
