जळगाव-लाईव्ह ट्रेंडस न्यूज प्रतिनिधी | डॉ. उल्हास पाटील वैद्यकीय महाविद्यालय व रुग्णालयातील कान-नाक-घसा तज्ज्ञांनी दुर्बिणीद्वारे मायक्रोलॅरीन्जल शस्त्रक्रियेद्वारे शेतमजुराच्या व्होकल कॉर्डवरील गाठ यशस्वीरित्या काढली. या शस्त्रक्रियेमुळे रुग्णाचा आवाज पूर्ववत झाला असून, त्याला पुन्हा स्पष्ट बोलता येऊ लागले आहे.
यावल तालुक्यातील दोनगाव येथील विजय भालेराव (वय ४५) हे शेतमजुरी करून आपल्या कुटुंबाचा उदरनिर्वाह चालवतात. तसेच बकरी चारण्याचे कामही करतात. काही महिन्यांपासून त्यांना आवाजात बदल जाणवू लागला. सुरुवातीला किरकोळ वाटल्याने त्यांनी दुर्लक्ष केले, मात्र हळूहळू आवाज पूर्ण बदलल्याने त्यांना बोलताना त्रास होऊ लागला. अखेर, त्यांनी डॉ. उल्हास पाटील रुग्णालयातील कान-नाक-घसा तज्ज्ञ डॉ. अनुश्री अग्रवाल यांची भेट घेतली. आवश्यक तपासण्या केल्यानंतर व्होकल कॉर्डवर गाठ असल्याचे निदान करण्यात आले.
व्होकल कॉर्डवरील गाठ वाढल्यामुळे विजय भालेराव यांचा आवाज पूर्णतः बदलला होता. त्यांना किडनीसंबंधित गंभीर आजारही असल्याने भूल देण्याबाबत तज्ज्ञांनी काळजी घेतली. कान-नाक-घसा तज्ज्ञांनी मोठ्या शस्त्रक्रियेऐवजी दुर्बिणीद्वारे मायक्रोलॅरीन्जल शस्त्रक्रिया करण्याचा निर्णय घेतला. मायक्रोस्कोपच्या मदतीने अचूक स्थानी लक्ष केंद्रित करून ही गाठ काढण्यात आली. आधुनिक तंत्रज्ञानाच्या मदतीने केलेली ही प्रक्रिया सुरक्षित ठरली आणि रुग्णाला मोठ्या शस्त्रक्रियेची गरज भासली नाही.
या शस्त्रक्रियेसाठी डॉ. जान्हवी बनकर, डॉ. रितू रावल, डॉ. चारू सोनवणे यांनी सहकार्य केले. तसेच ही शस्त्रक्रिया योजनेंतर्गत पार पडली, त्यामुळे रुग्णाला आर्थिक सवलतीचा लाभ मिळाला. शस्त्रक्रियेनंतर काही दिवसांच्या विश्रांतीनंतर विजय भालेराव यांच्या आवाजात सकारात्मक बदल जाणवला. त्यांना पुन्हा स्पष्ट बोलता येऊ लागले आणि त्यांचा आत्मविश्वासही वाढला आहे.
“व्होकल कॉर्डवरील गाठीमुळे अनेक रुग्णांच्या आवाजावर परिणाम होतो. मात्र, मायक्रोलॅरीन्जल शस्त्रक्रिया हे एक सुरक्षित आणि प्रभावी उपचार आहे. यामुळे रुग्णाचा आवाज पुन्हा पूर्ववत होऊ शकतो. या रुग्णाला वेळीच निदान व योग्य उपचार मिळाल्याने त्याचा आवाज सामान्य झाला, हे आमच्यासाठी आनंदाची बाब आहे. डॉ. उल्हास पाटील रुग्णालयात अद्ययावत तंत्रज्ञानाने केल्या जाणाऱ्या अशा शस्त्रक्रिया अनेक रुग्णांसाठी संजीवनी ठरत आहेत.” असे डॉ. अनुश्री अग्रवाल, विभागप्रमुख, नाक-कान-घसा यांनी सांगितले.
