जळगाव-लाईव्ह ट्रेंडस न्यूज प्रतिनिधी । राज्यातील आगामी स्थानिक स्वराज्य संस्थांच्या निवडणुकांसाठी भारतीय जनता पक्ष (भाजप) स्वबळावर लढण्याच्या तयारीत आहे, तसेच आम्हीदेखील स्वबळावर निवडणुका लढविण्याची पूर्ण तयारी केली आहे, असे राष्ट्रवादी काँग्रेस (अजित पवार गट) ओबीसी विभागाचे प्रदेशाध्यक्ष कल्याण आखाडे यांनी स्पष्ट केले आहे. जळगावमध्ये आयोजित पत्रकार परिषदेत त्यांनी ही महत्त्वाची घोषणा केली.
घड्याळ चिन्हावर जास्तीत जास्त उमेदवार उभे करण्याचा प्रयत्न
कल्याण आखाडे म्हणाले, “जळगाव नव्हे तर संपूर्ण महाराष्ट्रभर राष्ट्रवादीच्या (अजित पवार गट) घड्याळ या चिन्हावर अधिकाधिक उमेदवार उभे करण्याचा आमचा प्रयत्न आहे. स्थानिक स्वराज्य निवडणुकांसाठी आम्ही कार्यकर्त्यांना सक्रिय करत आहोत. भाजपप्रमाणे आम्हीदेखील स्वबळावर ताकद लावणार आहोत आणि स्थानिक पातळीवर पक्षाची ताकद वाढविण्यावर भर दिला जाईल.”
छगन भुजबळांचा विषय आता मागे पडला!
छगन भुजबळ यांचा मंत्रिमंडळात समावेश न झाल्याने ओबीसी समाजामध्ये नाराजी असल्याच्या चर्चांना उत्तर देताना कल्याण आखाडे म्हणाले, “छगन भुजबळ यांचा विषय आता मागे पडला आहे. पक्षाने पुढे वाटचाल करणे अधिक महत्त्वाचे आहे. पक्षाचे ध्येय आणि कार्यकर्त्यांचे हित लक्षात घेऊन आम्ही पुढे जात आहोत. आगामी निवडणुकीत ओबीसी समाजाच्या हिताचा विचार करून योग्य उमेदवार निवडले जातील.”
ओबीसी जोडो यात्रेच्या तयारीसाठी महत्त्वाची बैठक
राष्ट्रवादी काँग्रेसच्या (अजित पवार गट) ओबीसी जोडो यात्रेच्या तयारीसाठी जिल्हास्तरीय प्रमुख पदाधिकाऱ्यांची बैठक जळगावमध्ये आयोजित करण्यात आली होती. या बैठकीत स्थानिक पातळीवरील पक्ष संघटनेची बांधणी, निवडणूक रणनिती, तसेच ओबीसी समाजाच्या प्रश्नांवर चर्चा करण्यात आली. बैठकीला राष्ट्रवादीचे जिल्हाभरातील पदाधिकारी व प्रमुख कार्यकर्ते उपस्थित होते.
महायुती केवळ लोकसभा आणि विधानसभेपुरतीच मर्यादित
महायुतीत समाविष्ट असलेल्या भाजप, शिंदे गट आणि अजित पवार गटाने अनेकदा स्पष्ट केले आहे की, महायुती ही फक्त लोकसभा आणि विधानसभा निवडणुकांसाठी मर्यादित होती. स्थानिक स्वराज्य संस्थांच्या निवडणुकांसाठी स्थानिक नेत्यांना निर्णय घेण्याचे स्वातंत्र्य देण्यात आले आहे. ज्या ठिकाणी युती शक्य आहे तिथे युती केली जाईल, मात्र जेथे शक्य नसेल तेथे पक्ष स्वतंत्रपणे निवडणूक लढवेल.
स्थानिक स्वराज्य निवडणुकीत राष्ट्रवादीची ताकद वाढवण्याचा निर्धार
ओबीसी विभागाच्या बैठकीत स्थानिक स्वराज्य निवडणुकीसाठी पक्षाच्या कार्यकर्त्यांना मार्गदर्शन करण्यात आले. जिल्हानिहाय आढावा घेत पक्षसंघटनेला बळकट करण्यावर भर देण्यात येत आहे. पक्षाचे कार्यकर्ते आणि स्थानिक पदाधिकारीही स्वबळावर निवडणुका लढवण्यास तयार असल्याचा विश्वास कल्याण आखाडे यांनी व्यक्त केला.
