जळगाव लाईव्ह ट्रेंडस न्यूज प्रतिनिधी । बौद्ध धर्मियांसाठी अत्यंत पवित्र असलेले बोधगया हे धार्मिक स्थळ बुद्धांच्या ताब्यात देण्यात यावे, निवडणुकीत ईव्हीएम मशीनचा वापर बंद करून बॅलेट पेपरने मतदान घेण्यात यावे, इतर मागासवर्गीयांची (ओबीसी) जातनिहाय जनगणना करण्यात यावी आणि वक्फ बोर्ड कायदा रद्द करावा, या प्रमुख मागण्यांसाठी आज जळगाव जिल्हाधिकारी कार्यालयासमोर विविध संघटनांनी एकत्र येत जेलभरो आंदोलन केले.
जळगाव शहरातील शिवतीर्थ मैदानापासून या आंदोलनाला सुरुवात झाली. भारत मुक्ती मोर्चा, राष्ट्रीय पिछडा वर्ग मोर्चा, बुद्धिस्ट इंटरनॅशनल नेटवर्क आणि राष्ट्रीय मुस्लिम मोर्चा या संघटनांच्या कार्यकर्त्यांनी संयुक्तपणे मोर्चा काढला. हा मोर्चा शहरातील प्रमुख मार्गांवरून मार्गक्रमण करत जिल्हाधिकारी कार्यालयावर धडकला. त्यानंतर कार्यकर्त्यांनी आपल्या मागण्यांच्या समर्थनार्थ जेलभरो आंदोलन सुरू केले.
या आंदोलनाच्या पार्श्वभूमीवर जिल्हाधिकारी कार्यालया परिसरात पोलिसांनी मोठा बंदोबस्त तैनात केला होता, कोणताही अनुचित प्रकार घडू नये यासाठी पोलिसांनी योग्य ती खबरदारी घेतली होती. आंदोलकांनी आपल्या मागण्यांचे निवेदन जिल्हा प्रशासनाला सादर केले. निवेदनात बोधगया बौद्ध धर्मियांना हस्तांतरित करण्याची, ईव्हीएम ऐवजी बॅलेट पेपर वापरण्याची, ओबीसींची जातनिहाय जनगणना करण्याची आणि वक्फ बोर्ड कायदा रद्द करण्याची मागणी प्रामुख्याने करण्यात आली आहे.
आंदोलकांनी केंद्र आणि राज्य सरकारचे लक्ष आपल्या मागण्यांकडे वेधण्याचा प्रयत्न केला. त्यांच्या मते, बोधगया हे बौद्ध धर्मियांचे श्रद्धास्थान असून ते त्यांच्या व्यवस्थापनाखाली असणे आवश्यक आहे. ईव्हीएममध्ये गैरव्यवहार होण्याची शक्यता असल्याने बॅलेट पेपरद्वारे मतदान प्रक्रिया अधिक पारदर्शक होईल, असा विश्वास आंदोलकांनी व्यक्त केला. ओबीसींच्या सामाजिक आणि आर्थिक विकासासाठी जातनिहाय जनगणना आवश्यक असल्याचे त्यांनी सांगितले, तर वक्फ बोर्ड कायद्यातील काही तरतुदी अन्यायकारक असल्याचा आरोप आंदोलकांनी केला.
या संयुक्त आंदोलनात मोठ्या संख्येने कार्यकर्ते सहभागी झाले होते आणि त्यांनी आपल्या मागण्यांच्या समर्थनार्थ जोरदार घोषणाबाजी केली. जिल्हा प्रशासनाने आंदोलकांच्या भावनांची दखल घेऊन त्यांच्या मागण्या सरकारपर्यंत पोहोचवण्याचे आश्वासन दिले आहे.
