नवी दिल्ली -लाईव्ह ट्रेंडस न्यूज प्रतिनिधी | १८ व्या लोकसभेच्या निवडणुकीनंतर आता नवं सरकार सत्तेवर आले आहे. एनडीए आघाडीअंतर्गत नरेंद्र मोदी यांनी पंतप्रधानपदाची शपथ घेतली असून आणखी ७० जणांनी मंत्रिपदाची शपथ घेतली आहे. तसंच, या मंत्र्यांना खातेवाटपही करण्यात आले आहे. दरम्यान, आता नव्या सरकारचे पहिले अधिवेशन २४ जूनपासून सुरू होणार आहे. संसदीय कामकाज मंत्री किरेन रिजिजू यांनी यासंदर्भातील घोषणा आज बुधवारी केली. पहिल्या तीन दिवसांमध्ये नवीन सदस्यांचा शपथविधी आणि सभागृहाच्या अध्यक्षाची निवड करण्यात येईल. हे अधिवेशन ३ जुलै रोजी संपेल. राष्ट्रपती द्रौपदी मुर्मू २७ जून रोजी लोकसभा आणि राज्यसभेच्या संयुक्त अधिवेशनाला संबोधित करतील. इथंच त्या नवीन सरकारच्या पंचवार्षिक योजनेची रुपरेषा सांगण्याची शक्यता आहे.
१८ व्या लोकसभेचे पहिले अधिवेशन २४ जून ते ३ जुलै या कालावधित नवनिर्वाचित सदस्यांची शपथ, सभापती निवड, राष्ट्रपतींचे अभिभाषण आणि त्यावरील चर्चेसाठी बोलावण्यात आले आहे, असं किरेन रिजिजू यांनी त्यांच्या एक्स पोस्टमध्ये म्हटले आहे. रिजिजू यांनी असेही नमूद केले आहे की, “राज्यसभेचे २६४ वे अधिवेशन २७ जून रोजी सुरू होईल आणि ३ जुलै रोजी संपेल. पंतप्रधान मोदी २७ जून रोजी राष्ट्रपतींच्या अभिभाषणानंतर त्यांच्या मंत्रिमंडळांची संसदेत ओळख करून देतील, अशी अपेक्षा आहे.
