जळगाव-लाईव्ह ट्रेंड्स न्यूज प्रतिनिधी । हिंदू नववर्षाच्या स्वागतासाठी गुढीपाडव्याचा सण शहरात मोठ्या उत्साहात साजरा होत असताना जळगाव येथील डॉ. उल्हास पाटील वैद्यकीय महाविद्यालयाच्या परिसरातही पारंपरिक पद्धतीने मांगल्याची गुढी उभारण्यात आली. अन्नपुर्णालयम् परिसरात साजऱ्या झालेल्या या सोहळ्यामुळे वातावरण भक्तिमय आणि मंगलमय झाले.
या प्रसंगी राजपुरोहित डी. टी. राव यांनी विधीवत मंत्रोच्चार करत गुढीचे पूजन केले आणि पारंपरिक पद्धतीने गुढी उभारली. नववर्षाच्या शुभारंभाचे प्रतीक मानल्या जाणाऱ्या गुढीपाडव्याचे महत्त्व अधोरेखित करत उपस्थितांनी आनंदाने या सोहळ्यात सहभाग घेतला. गुढी उभारण्याच्या या विधीमुळे परिसरात सकारात्मक ऊर्जा आणि उत्साहाचे वातावरण निर्माण झाले.
या कार्यक्रमाला पियुष भंगाळे, सतीश मकारे, राजू वायकोळे, राहुल पोतदार, सुरेश भोंगे, पवन कोळी तसेच अन्नपुर्णालयम् मधील कर्मचारी मोठ्या संख्येने उपस्थित होते. सर्वांनी एकमेकांना नववर्षाच्या शुभेच्छा देत पारंपरिक सण साजरा करण्याचा आनंद लुटला.
गुढीपाडव्याच्या निमित्ताने आयोजित या सोहळ्याने महाविद्यालय परिसरात सांस्कृतिक परंपरेचे जतन आणि एकात्मतेचा संदेश दिला. अशा उपक्रमांमुळे तरुण पिढीमध्ये सण-परंपरांविषयी जागरूकता निर्माण होत असून, भारतीय संस्कृतीचे महत्त्व अधोरेखित होत आहे.
