दीपनगर-लाईव्ह ट्रेंडस न्यूज प्रतिनिधी । भुसावळ औष्णिक विद्युत केंद्र असलेल्या दीपनगरमध्ये सध्या अध्यात्माची गंगा वाहत आहे. येथे दरवर्षीप्रमाणे यंदाही श्रीमद् भागवत ज्ञानयज्ञ आणि अखंड हरिनाम संकीर्तन सप्ताहाचे अतिशय उत्साहात आयोजन करण्यात आले आहे. मंगळवार, २३ डिसेंबरपासून या सोहळ्याला सुरुवात झाली असून, ह.भ.प. संजय महाराज यांच्या रसाळ वाणीतून श्रीमद् भागवताचे श्रवण करण्यासाठी भाविकांनी मोठी गर्दी केली आहे.
धार्मिक कार्यक्रमांची रेलचेल
या सप्ताहाचे स्वरूप अत्यंत शिस्तबद्ध असून दररोज पहाटे पाच वाजल्यापासून कार्यक्रमांना सुरुवात होते. यात पहाटे ५ ते ६ काकडा आरती, त्यानंतर विष्णू सहस्त्रनाम पाठ आणि सकाळी ८:३० ते ११:३० व दुपारी २ ते ५ या वेळेत श्रीमद् भागवत प्रवचन होत आहे. सायंकाळी हरिपाठ आणि रात्री ८ ते १० या वेळेत नामसंकीर्तनाने दीपनगरचा परिसर दुमदुमून जात आहे.
विशेष आकर्षण: दिंडी आणि भारूड
येत्या २९ डिसेंबर रोजी दुपारी १२ ते ३ वाजेदरम्यान गीता पठन होणार आहे. याच दिवशी दुपारी ४ वाजता भव्य दिंडी सोहळा काढण्यात येईल, जो भाविकांसाठी आकर्षणाचा केंद्रबिंदू ठरेल. विशेष म्हणजे, २९ तारखेलाच सायंकाळी ६ ते ७ या वेळेत मनोरंजनातून प्रबोधन करणारा ‘भारूड’ हा कार्यक्रम देखील आयोजित करण्यात आला आहे. सप्ताहाचा समारोप ३० डिसेंबर रोजी सकाळी ७:३० ते ११ दरम्यान होणाऱ्या काल्याच्या कीर्तनाने आणि महाप्रसादाने होणार आहे.
प्रशासनाचे सहकार्य आणि सहभाग
दीपनगर औष्णिक विद्युत केंद्राचे मुख्य अभियंता राजेश मोराळे यांच्या हस्ते या महोत्सवाचे विधीवत पूजन करण्यात आले. या सोहळ्याच्या यशस्वी नियोजनासाठी ह.भ.प. पंडित महाराज पवार, रमेश साबळे महाराज, पुरुषोत्तम महाराज, कृष्णा नेमाडे, सुहास बराटे, तुषार नेमाडे यांच्यासह निंभोरा, साखरी फाटा आणि पिंपरी सेकम येथील भजनी मंडळे परिश्रम घेत आहेत. या आध्यात्मिक सोहळ्याचा लाभ घेण्याचे आवाहन आयोजकांनी केले आहे.
