जळगाव-लाईव्ह ट्रेंडस न्यूज प्रतिनिधी । जळगाव महानगरपालिका निवडणुकीसाठी उद्या, गुरुवारी १५ जानेवारी रोजी होणाऱ्या मतदानाच्या पार्श्वभूमीवर शहरात तणावमुक्त आणि शांततामय वातावरण राहावे, यासाठी पोलीस अधीक्षक डॉ. महेश्वर रेड्डी यांनी स्वतः रस्त्यावर उतरून सुरक्षा व्यवस्थेचे सूक्ष्म नियोजन केले आहे. मतदानाच्या पूर्वसंध्येला बुधवारी १४ जानेवारी रोजी सायंकाळी ६ वाजता त्यांनी शहरातील विविध संवेदनशील परिसरांना भेटी देऊन तिथल्या बंदोबस्ताची प्रत्यक्ष पाहणी केली.
नियोजनाची प्रत्यक्ष पडताळणी :
डॉ. महेश्वर रेड्डी यांनी संवेदनशील भागातील मतदान केंद्रांवर जाऊन तिथे लावण्यात आलेले बॅरिकेट्स, पोलिसांची उपस्थिती आणि सुरक्षेच्या उपाययोजनांचा आढावा घेतला. पोलीस कर्मचारी वेळेत आपापल्या पॉईंटवर पोहोचले आहेत की नाही, याची खातरजमा त्यांनी स्वतः केली. यावेळी त्यांनी स्थानिक अधिकाऱ्यांना सूचना दिल्या की, मतदानाच्या दिवशी कोणत्याही प्रकारचा गोंधळ किंवा गैरप्रकार खपवून घेतला जाणार नाही.
२२ केंद्रांवर अतिरिक्त फौजफाटा :
‘लाईव्ह ट्रेंडस न्यूज’शी बोलताना पोलीस अधीक्षकांनी माहिती दिली की, शहरातील १६९ केंद्रांपैकी २२ उपद्रवी (संवेदनशील) केंद्रांची निवड करण्यात आली असून, तिथे विशेष लक्ष दिले जाणार आहे. या ठिकाणी अतिरिक्त पोलीस कुमक तैनात करण्यात आली आहे.
असा आहे ‘तगडा’ बंदोबस्त :
निवडणूक शांततेत पार पाडण्यासाठी संपूर्ण शहरात १,१५० पोलीस कर्मचारी, १,१४० होमगार्ड, एसआरपीएफच्या २ कंपन्या, ६ पोलीस उपअधीक्षक आणि ६० अधिकारी तैनात करण्यात आले आहेत. पोलिसांनी केलेल्या या चोख नियोजनामुळे नागरिकांनी निर्भयपणे मतदानाचा हक्क बजावावा, असे आवाहन प्रशासनाकडून करण्यात आले आहे.
