जळगाव-लाईव्ह ट्रेंडस न्यूज प्रतिनिधी | सार्वजनीक बांधकाम खात्याचे अधिक्षक अभियंता प्रशांत सोनवणे यांनी आज अखेर बदली करण्यात आली आहे.
राजकीय वरदहस्त असल्याने अधिक्षक अभियंतापदी प्रशांत सोनवणे हे कधीपासूनच ठाण मांडून बसले होते. गेल्या अनेक दिवसांपासून सोनवणे यांच्या गैरकारभाराबाबत तक्रारी करण्यात येत होत्या. या अनुषंगाने आज अखेर त्यांची छत्रपती संभाजीनगर येथील नगरपालिका प्रशासन संचालनालयाच्या अधिक्षक अभियंतापदी बदली करण्यात आली आहे. याबाबतचे आदेश आज महाराष्ट्र शासनाचे अवर सचिव द. व. खारके यांनी काढले आहेत. यात त्यांनी आपल्या नवीन पदाचा कार्यभार हा तात्काळ सांभाळावा असे नमूद करण्यात आले आहे.
तत्कालीन अधिक्षक अभियंता रूपाली राऊळ-गिरासे असतांना प्रशांत सोनवणे यांच्याकडे अधिक्षक अभियंतापदाची जबाबदारी सोपविण्यात आली होती. यानंतर त्यांच्याकडे या पदाचा अधिकृत कार्यभार सोपविण्यात आला होता. त्यांच्या कार्यकाळात अनेक कामांमध्ये गैरव्यवहार होत असल्याच्या तक्रारी करण्यात आल्या होत्या. यानंतर त्यांची आता बदली करण्यात आली आहे. दरम्यान, बदली होऊन देखील राजकीय वरदहस्तामुळे त्यांच्याकडे जळगाव अधिक्षक अभियंतापदाचा कार्यभार राहणार की येथे नवीन अधिकारी येणार ? याबाबत आता चर्चेला उधाण आले आहे.
