जळगाव लाईव्ह ट्रेंडस न्यूज प्रतिनिधी । जळगाव-पाळधी राष्ट्रीय महामार्गावरील आव्हाणे गावाजवळ रविवारी, ७ डिसेंबर रोजी सायंकाळी ५.३० वाजताच्या सुमारास झालेल्या एका भीषण अपघातात दोन जण गंभीर जखमी झाले. अज्ञात ट्रकचालकाच्या बेदरकारपणामुळे हा अपघात घडला असून, याबाबत अपघाताच्या सहा दिवसानंतर जळगाव तालुका पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, नूतन वर्षा कॉलनी, जळगाव येथे राहणारी २१ वर्षीय पल्लवी रमेश छाडीकर ही तरुणी आपला सहकारी यश शिंपी यांच्यासोबत एका इको कारमधून (क्र. एमएच १९ ईजी १८७८) प्रवास करत होती. जळगाव ते पाळधी मार्गावर प्रवास करत असताना, आव्हाणे गावाजवळ इको कारने मुख्य रस्त्यावर यू-टर्न (वळण) घेण्याचा प्रयत्न केला.
नेमक्या याच वेळी, पाळधीकडून जळगावकडे भरधाव वेगाने येणाऱ्या एका ट्रकने (क्र. सीजी ०७ बीआर ३७१७) इको कारला जोरदार धडक दिली. धडक इतकी जबरदस्त होती की, इको कारचा चक्काचूर झाला. या भीषण अपघातात कारमध्ये असलेले पल्लवी छाडीकर आणि यश शिंपी हे दोघेही गंभीररित्या जखमी झाले. त्यांना तातडीने उपचारासाठी रुग्णालयात दाखल करण्यात आले आहे. या घटनेत वाहनाचेही मोठे नुकसान झाले आहे.
या अपघाताच्या संदर्भात, जखमी पल्लवी छाडीकर यांच्या तक्रारीवरून, अखेर शनिवार, १३ डिसेंबर रोजी रात्री ११ वाजता जळगाव तालुका पोलीस ठाण्यात ट्रकवरील अज्ञात चालकाविरुद्ध गुन्हा नोंदवण्यात आला आहे. या गुन्ह्याचा पुढील तपास पोलीस कॉन्स्टेबल श्रीकांत बदर हे करत आहेत. महामार्गावर यू-टर्न घेताना वाहनचालकांनी अधिक सावधगिरी बाळगण्याचे आवाहन यानिमित्ताने करण्यात आले आहे.
