जळगाव-लाईव्ह ट्रेंडस न्यूज प्रतिनिधी । जळगाव तालुक्यातील ममुराबादजवळ असलेल्या म्हाळसादेवी मंदिरासमोर मंगळवारी, ३० सप्टेंबर रोजी सकाळी ९.३० वाजता झालेल्या एका अपघातात मागून आलेल्या भरधाव दुचाकीने धडक दिल्याने दोन मित्र जखमी झाले. धडक देणारा दुचाकीस्वार घटनेनंतर पसार झाला असून, जळगाव तालुका पोलीस ठाण्यात अज्ञात चालकाविरुद्ध गुन्हा दाखल करण्यात आला आहे.
अमोल दगडू पिंजारी (वय ४०, रा. पिंप्राळा, जळगाव) आणि त्यांचा मित्र मोहम्मद आसिफ हे दोघे (दुचाकी क्र. एमएच १९ डीक्यू ०८३१) या दुचाकीवरून जळगावकडून धानोरा गावाकडे जात होते. सकाळी ९.३० वाजताच्या सुमारास ते ममुराबाद गावाजवळील म्हाळसादेवी मंदिराच्या समोरून जात असताना, मागून भरधाव वेगाने आलेल्या एका अज्ञात दुचाकीने (क्र. एमएच १९ ईसी ७५३०) त्यांच्या दुचाकीला जोरदार धडक दिली आणि कट मारला.
या धडकेमुळे अमोल पिंजारी आणि मोहम्मद आसिफ हे दोघेही रस्त्यावर कोसळले आणि जखमी झाले. अपघात घडवून आणल्यानंतर धडक देणारा अज्ञात दुचाकीस्वार कोणतीही मदत न करता, आपल्या दुचाकीसह घटनास्थळावरून पसार झाला.
जखमी मित्रांना तातडीने उपचारासाठी हलवण्यात आले. या घटनेनंतर अमोल पिंजारी यांनी जळगाव तालुका पोलीस ठाण्यात फिर्याद दिली. त्यानुसार, रात्री ११ वाजता अज्ञात दुचाकी चालकाविरुद्ध गुन्हा दाखल करण्यात आला आहे. या अपघाताचा पुढील तपास पोलीस हेड कॉन्स्टेबल प्रकाश चिंचोरे हे करत आहेत.
