गुरुग्राम – लाईव्ह ट्रेंड्स न्यूज वृत्तसेवा। ‘बिग बॉस’ विजेता आणि प्रसिद्ध यूट्यूबर एल्विश यादवच्या गुरुग्राममधील घराबाहेर रविवारी (१७ ऑगस्ट) पहाटे गोळीबार झाल्याची धक्कादायक घटना समोर आली आहे. सलमान खान आणि कपिल शर्माच्या मालमत्तांबाहेर झालेल्या गोळीबाराच्या घटना ताज्या असतानाच, एल्विशवरही अशा प्रकारचा हल्ला झाल्याने मनोरंजनसृष्टीत आणि सोशल मीडियावर खळबळ माजली आहे.
मिळालेल्या माहितीनुसार, रविवारी पहाटे तीन अज्ञात हल्लेखोर बाईकवरून आले आणि त्यांनी एल्विश यादवच्या घराबाहेर तब्बल १० ते १२ गोळ्या झाडल्या. ही घटना एवढी अचानक होती की परिसरात मोठी दहशत निर्माण झाली. सुदैवाने या गोळीबारात कोणीही जखमी झालं नसल्याची माहिती पोलिसांनी दिली आहे. त्या वेळी एल्विश स्वतः घरी नव्हता, मात्र घरात त्याचा एक कर्मचारी आणि काही इतर व्यक्ती उपस्थित होत्या.
गोळीबार झाल्यानंतर काही मिनिटांत स्थानिक नागरिकांनी पोलिसांना माहिती दिली. गुरुग्राम पोलिसांनी तात्काळ घटनास्थळी धाव घेत तपास सुरू केला. सध्या घटनास्थळाच्या परिसरातील CCTV फुटेजची तपासणी सुरू असून, हल्लेखोरांनी हेल्मेट घातल्यामुळे त्यांची ओळख पटवण्यात अडचण येत आहे. पोलिसांचा प्राथमिक अंदाज आहे की हा गोळीबार कोणत्यातरी इशाऱ्याचा भाग असू शकतो.
या प्रकरणाची चौकशी आता गुन्हे शाखेकडे सोपवण्यात आली आहे. गोळीबाराचा उद्देश काय होता, हे अद्याप स्पष्ट नाही. मात्र युट्यूबर आणि सेलिब्रिटींच्या सुरक्षेचा प्रश्न पुन्हा एकदा ऐरणीवर आला आहे. एल्विश यादवच्या घराजवळ आता पोलिस बंदोबस्त वाढवण्यात आला आहे आणि त्यांच्या सुरक्षेच्या दृष्टीने काही महत्त्वाचे निर्णय घेतले जात आहेत.
ही घटना उघडकीस येताच सोशल मीडियावर प्रचंड प्रतिक्रिया उमटत आहेत. एल्विश यादवचे चाहते आणि त्याचे फॉलोअर्स सोशल मीडियावर त्याच्या सुरक्षेबद्दल चिंता व्यक्त करत आहेत. ‘बिग बॉस’ विजेता म्हणून ओळखला जाणारा एल्विश यापूर्वी विविध वादांमुळे चर्चेत राहिला आहे, आणि त्यामुळे त्याला धमक्या मिळण्याची शक्यता पोलिसांकडूनही नाकारण्यात आलेली नाही.
अलीकडच्या काळात सलमान खानच्या घराबाहेर गोळीबार, त्यानंतर कपिल शर्माच्या रेस्टॉरंटबाहेर हल्ला आणि आता एल्विश यादवच्या घराबाहेर झालेला गोळीबार – या तिन्ही घटनांनी सेलिब्रिटींच्या सुरक्षेच्या यंत्रणेवर मोठा प्रश्नचिन्ह निर्माण केला आहे
