जळगाव लाईव्ह ट्रेंड्स न्यूज प्रतिनिधी | शासकीय वैद्यकीय महाविद्यालय व रुग्णालयात शुक्रवारी (३ ऑक्टोबर) रात्री ८.३० वाजेच्या सुमारास कर्तव्यावर असणारे डॉ. मोहित दीपक गादिया (वय २६, कनिष्ठ निवासी) यांना रुग्णाच्या नातेवाईकांनी बेदम मारहाण केल्याची संतापजनक घटना घडली आहे.
भादली येथून फटाका फुटल्यामुळे किरकोळ जखमी झालेले चार रुग्ण (महिला व पुरुष) उपचारासाठी आले होते. यावेळी रुग्णांच्या नातेवाईकांनी अत्यावश्यक विभागात प्रचंड गर्दी केली होती. डॉ. मोहित गादिया आणि त्यांच्या सहकाऱ्यांनी त्यांना “गर्दी करू नका, बाहेर जा, आम्हाला उपचार करू द्या” असे सांगितले. याचा राग आल्याने नातेवाईकांनी डॉ. गादिया यांच्या कानशिलात लगावली. त्यांना खाली पाडून लाथा-बुक्क्यांनी मारहाण केली. इतर डॉक्टरांनी धाव घेऊन डॉ. गादिया यांना सोडवले. या हल्ल्यामुळे डॉ. गादिया यांच्या कानाचा पडदा फाटला असून, त्यांना काही आठवडे विश्रांती घ्यावी लागणार आहे. रात्री ११ वाजता या प्रकरणी जिल्हापेठ पोलीस ठाण्यात तक्रार दाखल करण्यात आली आहे.
