जळगाव-लाईव्ह ट्रेंडस न्यूज प्रतिनिधी । गोदावरी फाउंडेशन संचलित डॉ. गुणवंतराव सरोदे आयुर्वेद मेडिकल कॉलेज, हॉस्पिटल आणि रिसर्च सेंटर येथे आयोजित आठ दिवसीय संस्कृत भाषा सप्ताहाचा समारोप नुकताच विविध सांस्कृतिक, शैक्षणिक आणि भाषिक कार्यक्रमांनी मोठ्या उत्साहात पार पडला. या सप्ताहात विद्यार्थ्यांनी संस्कृत भाषेचे महत्त्व जाणून घेत विविध उपक्रमांमध्ये सहभाग घेतला.
समारोप समारंभाला डॉ. उल्हास पाटील होमिओपॅथी महाविद्यालयाचे प्राचार्य डॉ. आर. के. मिश्रा, डॉ. उल्हास पाटील वैद्यकीय महाविद्यालयाचे वैद्यकीय अधीक्षक डॉ. प्रेमचंद पंडित, आणि डॉ. गुणवंतराव सरोदे आयुर्वेद मेडिकल कॉलेजचे अधिष्ठाता डॉ. हर्षल बोरोले यांची प्रमुख उपस्थिती होती. मान्यवरांनी यावेळी संस्कृत भाषेचे ऐतिहासिक, सांस्कृतिक आणि वैज्ञानिक महत्त्व विद्यार्थ्यांसमोर सोप्या भाषेत उलगडून सांगितले. अधिष्ठाता डॉ. हर्षल बोरोले यांनी विद्यार्थ्यांना संस्कृतच्या सखोल अभ्यासासाठी प्रेरित केले.
कार्यक्रमादरम्यान, विद्यार्थ्यांनी संस्कृत भाषेत विविध सांस्कृतिक सादरीकरणे केली. यामध्ये गीत, नृत्य, श्लोक वाचन आणि लघुनाटिकांचा समावेश होता, ज्यांनी उपस्थितांची मने जिंकली. विशेष म्हणजे, शिक्षकांनीही संस्कृतमध्ये गायन सादर करून विद्यार्थ्यांचे आणि उपस्थितांचे मनोबल वाढवले.
संस्थेचे अध्यक्ष डॉ. उल्हास पाटील यांनी विद्यार्थ्यांच्या उपक्रमशीलतेचे आणि संस्कृत भाषेवरील प्रेमाचे कौतुक केले. संस्थेचे सदस्य डॉ. वैभव पाटील आणि प्रशासन अधिकारी प्रमोद भिरुड यांनीही विद्यार्थ्यांचे विशेष अभिनंदन केले. संपूर्ण सप्ताहात संस्कृत भाषेच्या प्रचारासाठी घेण्यात आलेले विविध उपक्रम आणि उत्सवमय वातावरणामुळे विद्यार्थ्यांच्या मनात संस्कृत भाषेबद्दल आवड निर्माण झाली, असे यावेळी नमूद करण्यात आले. हा सप्ताह यशस्वीरित्या संपन्न झाल्याने विद्यार्थी आणि आयोजक दोघांमध्येही उत्साहाचे वातावरण होते.
