नुह-लाईव्ह ट्रेंडस न्यूज वृत्तसेवा | हरियाणातील नूह येथे पर्यटकांच्या बसला धडकल्याने मोठा अपघात झाला. हरियाणामध्ये कुंडली-मानेसर-पलवल मार्गावर नुह येथील तावडू येथे शुक्रवारी रात्री उशिरा दीड वाजता भाविकांनी भरलेल्या बसला आग लागली. या अपघातात 8 जण जिवंत जळाले असून त्यांचा जागीच मृत्यू झाला आहे. तर २५ हून अधिक जण गंभीररीत्या भाजले. त्यापैकी दोघांचा रुग्णालयात मृत्यू झाला.
बसमध्ये ६० जण प्रवास करत असल्याचे जखमींनी सांगितले आहे. अग्निशमन दलाने घटनास्थळी पोहोचून आगीवर नियंत्रण मिळवले. आगीचे कारण अद्याप समजू शकलेले नाही. हे सर्वजण नातेवाईक असून पंजाब-चंदीगड येथील रहिवासी आहेत. मथुरा-वृंदावनला भेट देऊन ते परतत होते. धावत्या बसमध्ये आग लागल्याचे पाहून स्थानिकांनी पोलिस आणि अग्निशमन दलाला माहिती दिली. तसेच स्वत: आग विझवण्याचा प्रयत्न केला.
